Skrifaði bók um óhugnanlegt morð – Lýsingar fóru ansi nærri sannleikanum

Metsölubók um morð

Pólski rithöfundurinn bíður hér málalykta.
Krystian Bala Pólski rithöfundurinn bíður hér málalykta.

Í byrjun september, 2007, var pólskur rithöfundur, Krystian Bala, dæmdur í 25 ára fangelsi. Glæpir hans vörðuðu mannrán, pyntingar og að lokum morð, en Krystian hafði bætt um betur því hann nýtti allt framannefnt sem efnivið í skáldsögu – sem seldist grimmt.
Umrædda glæpi hafði Krystian framið sjö árum áður þegar hann skipulagði og lét verða af morði á framkvæmdastjóra auglýsingastofu, frá Wroclaw, Dariusz Janiszewski að nafni.

Pyntaður fyrir dauðann

Lík Dariusz var fiskað upp úr ánni Oder af fiskimönnum, vel að merkja, í desember árið 2000, um fjórum vikum eftir að hann hvarf. Lík hans var klæðlaust og af áverkum að dæma hafði hann sætt pyntingum. Úlnliðir hans höfðu verið reyrðir saman fyrir aftan bak og bundnir við lykkju sem hafði síðan verið smeygt um háls hans.

Líkindi með morðinu

Lögreglan hafði fátt að styðjast við og eftir um hálfs árs rannsókn lagði Jacek Wroblewski, sem fór fyrir henni málið til hliðar. Í um það bil fimm ár safnaði málið ryki og jafnvel eftir útgáfu bókar Krystians, Amok, árið 2003 gerðist fátt. Bókin fjallar um hóp sadista sem leiðist afskaplega og segir sögumaður, Chris, frá morði þeirra á ungri konu. Smáatriðin varðandi morðið voru nánast eins og endursögn af morði Dariusz. Í bókinni komast óþokkarnir upp með að ræna, pynta og myrða ungu konuna.

En þegar upp var staðið slapp Krystian sjálfur ekki jafn vel.

Handtekinn, sleppt, handtekinn

Krystian Bala, sem iðulega hafði notað nafnið Chris á tíðum ferðum sínum til útlanda, var handtekinn árið 2005 eftir að Wroblewski hafði fengið ábendingu um að vert væri að kíkja í bók Krystians.

En Krystian var sleppt þremur dögum síðar vegna ónógra sannana, en Wroblewski var þó sannfærður um að hann væri morðinginn. Síðar, þegar fleira kom upp úr kafinu var Krystian handtekinn aftur en lögreglan hafði enn fátt áþreifanlegt, en það átti eftir að breytast.

Þekkti fórnarlambið

Lögreglan uppgötvaði að Krystian hafði þekkt Dariusz, hafði hringt í hann um það leyti sem hann hvarf og síðan selt síma hans á internetinu nokkrum dögum eftir morðið.

Þegar pólska sjónvarpið sendi út þátt, þar sem fjallað er um raunveruleg morðmál, rigndi inn skilaboðum frá hinum ýmsu stöðum í Austurlöndum, stöðum sem síðar kom í ljós að Krystian, sem var áhugamaður um scuba-köfun, hafði verið á þegar skilaboðin voru send.

Grunur olli morði

Krystian hélt fram sakleysi sínu, hélt því fram að hann hefði fengið efniviðinn í Amok úr umfjöllun fjölmiðla um morðið á Dariusz. Við réttarhöldin báru vitni sérfræðingar og leikmenn og sögðu að Krystian væri stjórnsamur fram úr hófi, hann væri æstur í að sýna fram á gáfur sínar, væri „sjúklega afbrýðisamur“ og hneigðist til sadisma.

Þar lá hundurinn grafinn því Krystian, að sögn dómara, var fullur afbrýðisemi vegna fyrrverandi konu sinnar: „Hann gat ekki leyft að fyrrverandi kona hans tengdist öðrum karlmanni böndum.“ En Krystian hafði grunað að Dariusz og fyrrverandi eiginkona sín hefðu átt í ástarsambandi.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.