Hann er kallaður George Clooney af vinum sínum og vonast til þess að finna sér vinnu og konu áður en langt um líður. Hér er átt við Spánverjann Jose Antonio sem vakti gríðarlega athygli á dögunum eftir að saga hans var sögð.

Sjá einnig:
Heimilislaus maður fékk nýtt útlit og táraðist þegar hann sá sig í spegli

Fyrir og eftir Það þarf oft ekki mikið til.

DV fjallaði um á fimmtudag en í umfjölluninni kom fram að Jose Antonio hefði búið á götunni á Mallorca undanfarinn aldarfjórðung eða svo.

Mögnuð breyting

Hann gekkst undir útlitsbreytingu sumarið 2015 af starfsfólki á hársnyrtistofu sem þekkti til hans, en myndband af breytingunni var fyrst birt í vikunni. Óhætt er að segja að breytingin hafi verið mikil, enda var Jose eins og klipptur út úr tískutímariti á eftir. Jose táraðist í myndbandinu og trúði vart sínum eigin augum.

Jose, sem er 55 ára, hefur haldið sér vel við á þeim tæpu tveimur árum sem liðin eru frá því myndbandið var tekið – svartir lokkarnir hafa þó vikið fyrir hans náttúrulega hárlit. Í nýju viðtali sem Telecinco á Spáni birti í dag segir Jose að breytingin hafi „breytt lífi hans“ og nú vinni hann að því að finna vinnu og eiginkonu til að eyða ævinni með.

Vill snúa við blaðinu

Jose hefur unnið fyrir sér með því að hjálpa vegfarendum að finna stæði fyrir bílana sína í miðborg Palma á Mallorca. Það gefur ekki sérstaklega vel af sér og segir Jose að engum myndi finnast það gaman að vinna við að leggja bílum eða finna stæði. Hann hafi gert það af illri nauðsyn til að geta átt fyrir mat og helstu nauðsynjum.

Jose vonast til þess að óvænt frægð verði til þess að honum takist að snúa blaðinu við eftir áratuga ógæfu, eins og hann sjálfur orðar það. Hann missti vinnuna fyrir margt löngu eftir að hafa greinst með þunglyndi en kveðst vera tilbúinn til að fara aftur út á vinnumarkaðinn.

Þess má geta að Jose býr ekki lengur á götunni, en nýlega bauðst ótilgreint fyrirtæki til að styrkja hann svo hann gæti fengið þak yfir höfuðið. Það þáði hann með þökkum en nú er næsta mál á dagskrá að finna vinnu.