Síðastliðinn aldarfjórðung eða svo hefur Spánverjinn Jose Antonio búið á götunni í sólarparadísinni Mallorca. Þessi viðkunnanlegi náungi hefur unnið fyrir sér með því að hjálpa borgurum að finna stæði fyrir bíla sína í miðborg Palma.

Flottur Jose gæti allt eins verið fyrirsæta.

Myndband sem tekið var Jose hefur vakið mikla athygli eftir að það var birt fyrst opinberlega á dögunum. Myndbandið sem um ræðir var tekið í júlí 2015 af starfsmönnum hársnyrtistofu sem þekktu til Jose. Hann þekkti sömuleiðis til starfsfólksins en þennan dag var honum boðið í klippingu, litun og skeggsnyrtingu sem hann þáði með þökkum.

Óhætt er að segja að breytingin hafi verið mikil, enda var Jose eins og klipptur út úr tískutímariti á eftir. Jose táraðist í myndbandinu og trúði vart sínum eigin augum.

Í umfjöllun Mail Online kemur fram að myndbandið hafi fyrst verið birt opinberlega fyrir skemmstu og vakið mikla athygli. Var það birt í kjölfar þess að hársnyrtistofan fagnaði þriggja ára afmæli sínu.

Í umfjölluninni kemur fram að Jose hafi orðið heimilislaus eftir að hafa greinst með þunglyndi og misst vinnuna. Myndbandið skemmtilega má sjá hér að neðan en í því heyrist Jose meðal annars spyrja hvort þetta sé raunverulega hann í speglinum. „Það mun enginn þekkja mig nema ég segi viðkomandi hver ég er,“ segir hann og sú varð einmitt raunin.