Pascale Defolie hvarf fyrirvaralaust – Lík hennar fannst þremur árum síðar
Lögreglan í belgíska þorpinu Dison var ekki í vafa um að Pascale Defolie, 33 ára, tveggja barna móðir, væri ekki lengur í tölu lifenda. Fjölskylda Pascale hafði, 13. mars 2003, tilkynnt lögreglunni að hún væri horfin og það voru engar ýkjur því hálfu ári síðar hafði hvorki fundist af henni tangur né tetur.
Ári eftir að Pascale hvarf var lögreglan þess fullviss að eitthvað illt hefði komið fyrir Pascale og einu og hálfu ári eftir hvarfið taldi hún víst, sem fyrr segir, að Pascale væri látin. En hvar var líkamsleifar hennar að finna?
Pascale hafði síðast sést á lífi við vatn við Gileppe-stífluna og í júlí 2004 einbeitti lögreglan sér að svæðinu þar í grennd. Kafarar leituðu í vatninu og fundu eitthvað, en yfirvöld ákváðu að upplýsa ekki nánar um hvað rekið hefði á fjörur hennar.
Þó var ljóst að ekki var um lík Pascale að ræða og fór sá orðrómur á kreik að lík einhvers annars hefði fundist. En allt um það.
Lík eða ekki lík, lögreglan handtók Francesco Licata, 45 ára, og í desember 2004 var hann ákærður fyrir morð á Pascale. Umræddur Francesco, sem reyndar var eiginmaður Pascale, viðurkenndi síðar að hafa kyrkt hana og flutt líkið, með aðstoð mágs síns. Höfðu þeir félagar grafið líkið skammt frá orkuveri Dison.
Reyndar gat Francesco ekki gefið lögreglunni nákvæmar upplýsingar um staðsetningu grafarinnar.
Ekki einfaldaði það leitina að líki Pascale að eftir að Francesco gróf það hafði hluti orkuversins verið jafnaður við jörðu vegna breytinga. Lögreglan gróf hér og þar en án árangurs og greip þá til þess ráðs að beita fyrir sig leitarhundum sem voru sérstaklega þjálfaðir til að finna niðurgrafnar líkamsleifar. Hundarnir fundu stað þar sem einhvern tímann hafði legið lík, en þegar þarna var komið sögu var ekkert slíkt að sjá.
Liðu nú nokkrir tíðindalitlir mánuðir en þá bar svo við að ættingi Francesco leysti gátuna. Hann upplýsti lögregluna um að vissulega hefði Francesco grafið lík eiginkonu sinnar við orkuverið. En þegar Francesco varð þess áskynja að byggingaframkvæmdir væru í bígerð hefði hann brugðið á það ráð að grafa líkið upp og hola því niður í garði yfirgefins húss, ekki langt frá heimili hans sjálfs, sagði þessi ónafngreindi ættingi.
Og viti menn, eftir þriggja ára árangurslausa leit fundust loks líkamsleifar Pascale Defolie. Reyndar hefur Francesco alla tíð þvertekið fyrir að hafa flutt líkið frá orkustöðinni í garðinn og eftir stendur spurningin: ef ekki hann – hver þá?
Árið 2007 var réttað yfir Francesco og var hann sakfelldur fyrir morðið á eiginkonu sinni.
