Óhætt er að segja að Venesúelamaðurinn Adrian Solano hafi vakið talsverða athygli í netheimum undanfarinn sólarhring eftir að myndband af frammistöðu hans í keppni á gönguskíðum fór að ganga um netið.
Adrian þessi var staddur í Finnlandi sem fulltrúi Venesúela þar sem hann tók þátt í undankeppni vegna HM í skíðagöngu sem haldin er í Lahti.
Eins og sést á meðfylgjandi myndbandi átti Solano býsna erfitt með að fóta sig á skíðunum og ástæðan fyrir því er raunar einföld. Solano hafði aldrei skíðað í snjó og aðeins stundað æfingar á hjólaskíðum í heimalandi sínu, Venesúela. Eins og þeir sem stundað hafa báðar þessar greinar vita eru þær talsvert frábrugðnar þó þær séu í eðli sínu líkar.
Adrian sagði fylgjendum sínum á Instagram að hann hefði reynt að gera sitt besta. „Ég hef aldrei fengið að kynnast snjó og hafði ekki tækifæri á að æfa mig í honum. Ég datt kannski nokkrum sinnum en það sem máli skiptir er að ég mun aldrei gefast upp,“ sagði Adrian sem sumir hafa kallað versta skíðamann heims.
Í frétt BBC kemur fram að Adrian hafi ætlað sér að dvelja við æfingar í Svíþjóð í mánuð áður en undankeppnin fór fram. Þegar hann kom til Parísar þann 19. janúar síðastliðinn var hann stöðvaður á flugvellinum og tjáð að hann mætti ekki fara til Svíþjóðar. Hann var því sendur heim þar sem yfirvöld töldu að hætta væri á að hann myndi sækja um hæli í Svíþjóð vegna stöðu efnahagsmála í heimalandi hans.
Þess má geta að Adrian lauk ekki keppni í undankeppninni.