Það er ekki alltaf tekið út með sældinni að vera vegan eins og farþegi í millilandaflugi komst að raun um á dögunum.

Farþeginn, Steve Hogarty, er vegan og neytir þar af leiðandi ekki dýraafurða. Hann var um borð í flugvél Avianca-flugfélagsins í Kólumbíu á dögunum þegar hann spurði flugþjóna um borð hvort hann gæti fengið vegan-máltíð í stað venjulegrar heitrar máltíðar sem oftar en ekki samanstendur af einhverju kjötmeti.

Það var lítið mál en Hogarty trúði vart sínum eigin augum þegar hann fékk máltíðina í hendurnar; um var að ræða epli og peru, í plastbakka, borin fram með hnífi og gaffli.

Þó epli og pera séu næringarríkir ávextir duga þeir kannski ekki alveg til að metta svangan maga – nema kannski í skamma stund.

Steve birti færsluna á Twitter þar sem hann fékk mikil viðbrögð, einkum frá þeim sem aðhyllast sama lífsstíl og hann. Sumir tóku undir umkvartanir hans og sögðu frá svipuðum uppákomum.

Einn sagðist til dæmis nýlega hafa verið í flugi og hann hafi spurt flugþjón hvort hann gæti fengið vegan-máltíð. Því miður bauð flugfélagið ekki upp á þann möguleika en manninum voru þó boðnar sárabætur. Og sárabæturnar voru kjúklingur eða nautakjöt.

Flugfélagið svaraði færslu Steves og sagðist vilja veita fyrsta flokks þjónustu. Var Steve vinsamlegast beðinn um að setja sig í samband við flugfélagið.