Vegfarendum var verulega brugðið þegar þeir gengu framhjá gámnum

Þessi sjón blasti við vegfarendum eins og mynd Fanaposten ber með sér.
Deigið lyfti sér Þessi sjón blasti við vegfarendum eins og mynd Fanaposten ber með sér.
Mynd: Fanaposten

Óhætt er að segja að vegfarendum sem áttu leið framhjá ruslagámi í borginni Bergen í Noregi hafi brugðið nokkuð á dögunum. Eins og meðfylgjandi mynd ber með sér var engu líkara en einhverju hræðilegu hefði verið komið fyrir í gámnum.

„Ég hélt fyrst að ég væri loksins kominn í kynni við Jabba the Hutt,“ sagði blaðamaður Fanaposten í Noregi um það þegar hann var sendur á vettvang til að kanna málið. Blaðinu höfðu borist ábendingar um að einhverju dularfullu hefði verið komið fyrir í gámnum.

Við nánari eftirgrennslan kom þó í ljós að það sem var í gámnum var ekkert svo hræðilegt. Í nágrenninu stendur yfir undirbúningur vegna opnunar Dominos-pítsustaðar og var um að ræða deig sem notað er til undirbúnings fyrir starfsfólk.

Bakarar þurfa að kunna réttu handtökin við framleiðslu á deiginu sem síðan er hent í ruslið. Svo virðist vera sem starfsfólkið hafi gleymt að gera ráð fyrir að deigið myndi lyfta sér og urðu afleiðingarnar þessar.

„Að sjálfsögðu er þetta algjörlega óásættanlegt og þessi mistök munu ekki endurtaka sig,“ segir Kenneth Lorentzen, framkvæmdastjóri Dominos í Noregi.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.