Hugðu á skjótfenginn gróða – Ránið breyttist í morð
Kviðdómur í Shasta-sýslu í Bandaríkjunum komst þann 14. mars 2013 að þeirri niðurstöðu að Vanessa Kay Williamson, þá 27 ára, væri sek um morð á kærasta sínum, Daniel Ravnesh Khelawan, 28 ára frá Sacramento, 8. janúar árið 2010.
Þann 22. apríl 2013 fékk Vanessa lífstíðardóm án möguleika á reynslulausn. Rétt áður en dómari í málinu gerði dóm sinn heyrinkunnan fór Vanessa að kjökra óstjórnlega og sagðist saklaust fórnarlamb.
„Ég vildi aldrei að nokkrum yrði gert mein,“ sagði hún og ítrekaði að hún hefði ekki tekið í gikkinn á þeirri byssu sem notuð var við morðið á Daniel.
„Það var Robert sem tók í gikkinn. Ég skil bara ekki af hverju allir eru að hamast í mér. Ég skil ekki af hverju öllu er dembt á mig,“ sagði Vanessa kjökrandi.
Vanessa hafði nokkuð til síns máls; hún hafði ekki skotið Daniel til bana, en að mati dómara, saksóknara og kviðdóms lék enginn vafi á að ódæðið hefði verið undan hennar rifjum runnið.
Nefndur Robert, fullu nafni Robert Lee James IV, var kærasti Vanessu, já, hún ku hafa átt þá tvo á þessum tíma, lýsti, árið 2012, sig sekan um manndráp í málinu. Hann játaði sig einnig sekan um ránstilraun og sitthvað fleira og að launum fyrir að vera jafn samvinnuþýður og raun bar vitni var hann dæmdur til 32 ára fangelsisvistar og sex mánuðum betur.
Það var þó skoðun ákæruvaldsins að Vanessa hefði ginnt Robert til óhæfuverksins.
Þannig var mál með vexti að Daniel Ravnesh Khelawan vann við að keyra út lyfseðilsskyld lyf til hjúkrunarheimila og fleiri viðlíka stofnana.
Vanessa fékk þá snilldarhugmynd að hún og Robert létu til skarar skríða þegar Daniel væri í útkeyrslu og rændu lyfjunum og öllu fémætu.
Í sjálfu sér ekki verri hugmynd en hver önnur þar til Vanessa og Robert gerðu sér grein fyrir að yfirgnæfandi líkur voru á að Daniel myndi bera kennsl á að minnsta kosti Vanessu.
Talið var að Vanessu og Robert hefði orðið ljóst að Daniel yrði að deyja, því annars mundi hann einfaldlega vísa lögreglunni á þau. Saksóknari í málinu, Stephanie Bridgett, sagði að Vanessa hefði narrað Robert til að drepa Daniel með því að segja að hann sæti um hana hvar sem hún færi og hefði hótað henni og fjölskyldu hennar, þar á meðal ungri dóttur hennar.
Hvað sem því líður þá var Daniel skotinn fimm skotum og Robert hélt á byssunni.
Tár Vanessu undir lok réttarhaldanna breyttu í engu skoðun ákæruvaldsins. „Hún grætur sjálfrar sín vegna,“ sagði Stephanie Bridgett.