Fyrirtækið Vivos býður fólki að leigja neðanjarðarbyrgi ef allt fer til fjandans
Langt inn í miðju landi Bandaríkjanna, í vesturhluta Suður-Dakóta, stendur þyrping meðalstórra neðanjarðarbyrgja sem láta ekki sérstaklega mikið yfir sér. Áður fyrr gegndu þessi neðanjarðarbyrgi hernaðarlegum tilgangi en í dag er tilgangur þeirra annar og meiri. Þarna munu þeir sem eiga peninga geta leitað ef allt fer til fjandans.
Rekstraraðili byrgjanna er fyrirtæki sem heitir Vivos Group og sinnir ört stækkandi markaði þeirra sem vilja tryggja framtíð sína. Ef kjarnorkustyrjöld brýst út, alvarlegir sjúkdómsfaraldrar ógna framtíð mannkyns eða loftsteinn lendir á jörðinni geta þeir sem hafa tryggt sér byrgin leitað í þau.
Vivos keypti umrædd neðanjarðarbyrgi á síðasta ári og verða þau leigð þeim sem vilja tryggja framtíð sína á óvissutímum. Hægt verður að leigja þau til 99 ára og er ársleiga þúsund Bandaríkjadalir, 115 þúsund krónur á núverandi gengi. Fyrirtækið krefst þess að leigjendur greiði 25 þúsund dala tryggingu fyrirfram, eða tæpar þrjár milljónir króna. Þessa dagana er unnið að því að koma byrgjunum í stand og hefur fyrirtækið auglýst þau til leigu. Sú vinna er sögð ganga ágætlega og vonast forsvarsmenn fyrirtækisins til þess að aðstaða fyrir starfsmenn, skrifstofur og fleira verði tilbúin fyrir haustið.
Byrgin eru leigð í núverandi ástandi og án rafmagns, vatns og loftræstibúnaðar svo dæmi séu tekin. Fólki stendur til boða að fá þau fullbúin, til dæmis með húsgögnum og afþreyingu, biljarðborðum og sjónvörpum þar á meðal, en fyrir það þarf að greiða sérstaklega. Þegar öllu er á botninn hvolft munu þessar viðbætur kosta fleiri milljónir króna.
Neðanjarðarbyrgin voru byggð af hernum árið 1942 þegar síðari heimsstyrjöldin stóð sem hæst og voru þau í notkun, ef svo má segja, til ársins 1967. Síðan þá hafa þau staðið tóm. Byrgin, sem eru 575 talsins, eru þannig úr garði gerð að þau geta þolað ýmislegt, til dæmis mjög öflugar sprengingar.
„Hver sem hættan verður þá eru byrgin okkar byggð þannig að þau geta þolað nánast hvað sem er.“
Að sögn forsvarsmanna Vivos geta allt að fimm þúsund manns búið í byrgjunum og lofa forsvarsmenn fyrirtækisins hugsanlegum viðskiptavinum því að boðið verði upp á mjög góða öryggisgæslu ef heimsendir nálgast. Þá verði starfsmenn til taks ef á þarf að halda, eins konar húsverðir sem geta sinnt viðhaldi á byrgjunum. Loks verði einnig boðið upp á kennslu fyrir börn viðskiptavina og verslun sem mun selja helstu nauðsynjavörur.
Sem fyrr segir standa framkvæmdir við byrgin nú yfir og áhugasamir þurfa ekki endilega að bíða eftir heimsendi til að flytja inn. Þeim sem tryggja sér byrgin er í sjálfsvald sett hvenær þeir flytja inn, en að sögn forsvarsmanna Vivos gætu fyrstu leigjendurnir flutt inn strax í sumar.
„Hver sem hættan verður þá eru byrgin okkar byggð þannig að þau geta þolað nánast hvað sem er; ofureldgos, sólblossa, flóðbylgjur, faraldra, loftsteinaregn og manngerða ógn, svo sem kjarnorkusprengjur, kjarnorkuslys, eiturefnaslys, hryðjuverk og almennt stjórnleysi,“ segir í umsögn á heimasíðu Vivos. Meðfylgjandi eru myndir frá þessum athyglisverða stað í nágrenni Svörtuhæða í Suður-Dakóta.