Ófáir notendur samfélagsmiðla hafa velt fyrir sér einum af lífvörðum Donalds Trumps Bandaríkjaforseta, sem fylgdi forsetanum niður Pennsylvania Avenue í Washington á föstudag.
Forsetinn gekk um götuna ásamt eiginkonu sinni, Melaniu Trump, og syni, Barron, og veifaði til stuðningsmanna sinna. Fjöldi lífvarða fylgdi fjölskyldunni hvert fótmál en einn úr hópnum vakti sérstaka athygli.
Eins og sést á meðfylgjandi myndskeiði og myndum virðist maðurinn ekki hreyfa hægri höndina sem var í læstri stöðu þær mínútur sem gangan stóð yfir.
Ýmsum kenningum hefur verið fleygt fram hvað þetta varðar og ein þeirra, sem nýtur einna mestrar hylli, er sú að maðurinn hafi verið með byssu undir jakkanum og tilbúinn að bregðast við eitthvað óvænt kæmi upp. Lífvörðurinn hafi því gengið um með gervihönd.
Hvað sem öllum vangaveltum líður kom ekki til þess að hann þyrfti að bregðast við.
Myndband af þessu má sjá hér að neðan: