Það er eitt að vera seinlæs en almenningsbókasafnið í San Francisco hefur nú endurheimt bók sem fengin var að láni fyrir 100 árum.

Það var árið 1917 sem hin 83 ára gamla Phoebe Marsh Dickenson Webb fékk bókina að láni sem ber þann kaldhæðnislega titil „40 Minutes Late – and Other Stories“

Svo fór að hún lést áður en hún náði að skila bókinni. Barnabarnbarn hennar, Webb Johnson, fann síðan bókina ekki fyrr en árið 1996 þegar hann var að fara í gegnum hluti sem geymdir voru í gömlu kofforti. Hann ákvað að eiga bókina og las hana meira að segja, að því er fram kemur í viðtali við hann í San Francisco Chronicle.

Ef miðað er við sektargreiðslur nútímans í safninu, upp á 10 sent á dag, hefði verið hægt að rukka afkomendur Phoebe Dickenson um 3,650 dali –eða rúmar 412 þúsund krónur– þegar þeir skiluðu henni nú á dögunum. En bókasafnið sendi nýverið út tilkynningu þar sem seinlæsum var tilkynnt að ekki yrði rukkað fyrir bækur sem löngu væri orðið tímabært að skila á tímabilinu 3. janúar til 14. febrúar. Fjölskyldan ákvað því að nýta tækifærið og skila loks bókinni, 100 árum eftir að hún var tekin.

Safnstjóranum, Luis Herrera, datt enda ekki í hug að lesa fjölskyldunni pistilinn vegna seinagangsins heldur var hann hæstánægður með að endurheimta bók með svo merkilega sögu.

Enn á eftir að ákveða hvort bókin fari aftur í hillur safnsins eða hugsanlega í sýningarkassa en Webb Johnson er á því að bókina ætti að setja aftur í umferð.

„Ég hafði mjög gaman að því að lesa hana, það var ein af ástæðunum fyrir því að ég geymdi hana.“