Dýrustu eignirnar sem eignuðust nýja eigendur á árinu 2016
Margar af glæsilegustu fasteignum veraldar eignuðust nýja eigendur á árinu 2016. Dýrasta fasteignin sem keypt var kostaði hvorki meira né minna en 270 milljónir Bandaríkjadala, 31 milljarð króna. Tekið skal fram að hér er einungis átt við heimili en ekki stærri fasteignir sem notaðar eru í öðrum tilgangi.
Dýrustu eignina sem um ræðir, í Hong Kong, keypti kínverski fasteignamógúllinn Hongtien Chen, en eignin er tæplega 900 fermetrar að stærð, á besta stað í hverfi hinna efnameiri þar sem hún gnæfir yfir Hong Kong. Í öðru sæti á þessum lista var önnur fasteign í Asíu, nánar tiltekið í Suzhou í Kína, sem kostaði 154 milljónir dala, 17,6 milljarða króna. Fasteignin stendur tignarleg skammt vestur af Sjanghæ. Breska blaðið Daily Mail tók saman upplýsingar um dýrustu fasteignirnar sem skiptu um hendur á liðnu ári.
Sem fyrr segir var það Kínverjinn Hongtian Chen sem keypti þessa glæsilegu eign í Hong Kong. Fyrirtæki hans, Cheung Kei Group, fjárfestir í fasteignum, hótelum og fjármálastarfsemi í Hong Kong. Í viðtali við South China Morning Post, þegar greint var frá kaupunum, sagði Hongtian að hann hefði keypt húsið til einkanota. Það væri erfitt að græða á fjárfestingu sem þessari.
Þessi glæsilega fasteign kom á sölu í Kína á liðnu ári og var ásett verð hátt í 18 milljarðar króna. Fasteignin hefur viðeigandi nafn, Taohuayuan, eða Útópía á íslensku. Ekki liggur fyrir hver keypti fasteignina, sem er með 32 herbergjum, hvorki meira né minna. Miðað við efnahagsuppganginn í Kína og ört fjölgandi milljarðamæringa er ekki útilokað að eignin hafi verið tiltölulega fljót að seljast.
The Crespi Hicks er stórglæsileg eign í Dallas í Bandaríkjunum. Andrew Beal, stofnandi Beal-bankans, splæsti 100 milljónum dala í eignina á liðnu ári, upphæð sem nemur 11,4 milljörðum króna. Sjö svefnherbergi eru í húsinu og er lofthæð á bilinu 4 til 5 metrar. Eignin var eitt sinn í eigu Tom Hicks sem líklega er einna best þekktur fyrir að hafa verið einn af eigendum knattspyrnuliðsins Liverpool.
Í fjórða sæti í úttektinni er sjálf Playboy-höllin sem var í eigu Hugh Hefner, stofnanda tímaritsins fræga. Það var ungur auðkýfingur, Daren Metropoulous, 33 ára meðeigandi Hostess, sem framleiðir meðal annars Twinkies-sælgætið, sem keypti höllina og er hann talinn hafa greitt 100 milljónir dala fyrir, eða 11,4 milljarða króna. Hefner hafði búið í húsinu frá árinu 1971 en í því eru sjö svefnherbergi, átta baðherbergi, vínkjallari, lítið kvikmyndahús, líkamsræktarstöð, tennisvöllur og sundlaug að sjálfsögðu.
Tom Gores, eigandi NBA-liðsins Detroit Pistons, er talinn hafa greitt tæplega 100 milljónir dala fyrir þetta glæsilega hús við Carolwood Drive í Los Angeles. Það væsir ekki um Gores og fylgdarlið hans í húsinu sem er samtals 2.800 fermetrar að stærð. Í því eru 10 svefnherbergi og á lóðinni við það eru íþróttavellir og sundlaug. Þess má geta að í húsinu er sérstök svíta, tæpir 500 fermetrar að stærð, sem hugsuð er fyrir aðaleigendur hússins.
