Lamb var forfallinn fíkniefnaneytandi – Hóf neyslu 12 ára að aldri
Í nóvember 2013 fékk Kanadamaðurinn Shawn Cameron Lamb 20 ára fangelsisdóm fyrir morð á tveimur konum í Winnipeg, höfuðborg Manitoba-fylkis í Kanada. Að sögn hafði tilvera Lambs, þá 54 ára að aldri, verið æði þokukennd um margra mánaða skeið vegna mikillar og stöðugrar fíkniefnaneyslu.
Fórnarlömb Lambs voru Carolyn Sinclair, 25 ára, og Lorna Blacksmith, 18 ára, en þær voru báðar fíkniefnaneytendur og mögulega berskjaldaðar sökum lífsstíls síns.
Lamb myrti Carolyn 18. desember 2011, og Lornu 11. janúar 2012, og lék lítill vafi á sekt hans, enda játaði sig sekan um bæði morðin.
Reyndar var það svo að áður en játning Lambs lá fyrir höfðu sjónir lögreglunnar beinst að honum, en 22. júní 2012, var hann, eins og svo oft áður, í varðhaldi, reyndar vegna einhvers alls ótengdu umræddum morðum.
Einhverra hluta vegna kjaftaði á honum hver tuska og hver yfirlýsingin varðandi morðin rak aðra og lögreglan vissi vart hvaðan á sig stóð veðrið.
En síðar, sökum þess ástands sem Lamb var í þegar hann játaði á sig morðin, sáu verjendur Lambs sér leik á borði og náðu að knýja fram samning fyrir skjólstæðing sinn; möguleika á reynslulausn eftir tíu ára afplánun.
Lamb og Carolyn hittust 18. desember og ákváðu að slá saman í krakk, sem þau og gerðu. Að því loknu fóru þau heim til Lambs að Notre Dame-breiðgötu númer 822 til að neyta þess í ró og næði.
Snurða hljóp á þráðinn þegar Carolyn sló eign sinni á restina af fíkniefninu, fór inn á klósett og læsti að sér.
Það hugnaðist Lamb ekki og hann braut sér leið inn á salernið og barði Carolyn til óbóta með axarskafti. Í skýrslum segir: „hann [Lamb] sagði að hún hefði verið með meðvitund og því hafi hann kyrkt hana þar til hún var liðið lík.“
Í nokkra daga lá líkið óhreyft í íbúð Lambs en að lokum vafði hann það inn í plast og tróð því í sjópoka sem hann síðan fleygði í ruslagám við Notre Dame-breiðgötu.
Líkamsleifarnar fundust ekki fyrr en 31. mars 2012 og ljóst að Carolyn, sem hafði verið barnshafandi, hafði hlotið ofbeldisfullan dauðdaga. Lífsýni sýndu að hún hefði verið í íbúð Lambs og renndu enn frekari stoðum undir sannleiksgildi játningar hans.
Lorna Blacksmith var einnig myrt í íbúð Lambs og líka sökum ósættis vegna fíkniefna. Greinilega hefur krakkið verið uppurið því Lorna reyndi að hringja í birginn sinn til að fá meira af herlegheitunum.
Það hleypti einhverra hluta vegna illu blóði í Lamb því hann fleygði Lornu í gólfið og kyrkti hana með símasnúrunni. Samkvæmt yfirlýsingu hans reyndi hann að endurlífga hana en hafði ekki erindi sem erfiði.
Lamb stal síðan plastdúk af nærliggjandi byggingarsvæði, vafði lík Lornu inn í það og losaði sig við það á bakstíg við yfirgefið hús á Simcoe-stræti.
Líkamsleifar Lornu fundust um hálfu ári síðar, í kjölfar upplýsinga frá Lamb, en sökum rotnunar var ekki hægt að úrskurða um dánarorsök, aðeins að ofbeldi hefði komið við sögu.
Lamb var einnig ákærður fyrir morð á konu að nafni Tanya Nepinak, sem hafði horfið, en málalyktir hafa ekki fengist í það mál
Glæpaferill Lambs nær allt aftur til 8. áratugar 20. aldar og er hann með yfir 100 dóma á bakinu. Sumir dómanna varða ofbeldisglæpi, þar á með kynferðisglæpi. Flesta glæpi framdi hann þó til svala eiturlyfjafíkn sinni, en hann hóf neyslu harðra efna aðeins 12 ára að aldri.
Lamb fór ekki í launkofa með þá staðreynd að hann hefði eytt mestallri ævi sinni í eymd, vesaldóm og neyslu fíkniefna, en eitthvað virðist hafa rofað til í höfðinu á honum undir lok réttarhaldanna: „Ég iðrast. Ég finn til hluttekningar. Ég geri mér grein fyrir að til staðar er mikil reiði, ógeð, hatur – þau [aðstandendur fórnarlamba hans] þrá hefnd.“