Jacob Wetterling var rænt af grímuklæddum manni þann 22. október árið 1989
Fjölskylda ellefu ára drengs, Jacobs Wetterling, sem hvarf sporlaust árið 1989 hefur loksins fengið staðfestingu á að líkamsleifar sem fundust fyrir skemmstu séu af honum. Þetta var staðfest af lögreglu í Annandale í Minnesota í Bandaríkjunum á laugardag.
Hvarfið á Jacob vakti mikla athygli á sínum tíma og í frétt CNN segir að vitnisburður barnaníðingsins Danny James Heinrich hafi orðið til þess að líkamsleifar Jacobs fundust. Danny þessi lá undir grun á sínum tíma. Það var svo í gær, þriðjudag, að lögregla tilkynnti að Danny hefði játað að hafa rænt drengnum og myrt hann.
Jacob var á leið heim til sín á reiðhjóli að kvöldi 22. október 1989 ásamt bróður sínum og besta vini þegar grímuklæddur maður, vopnaður byssu, nálgaðist þá. Hann sagði bróður og vini Jacobs að hafa sig á brott – sem þeir og gerðu – en árasarmaðurinn rændi Jacob sem sást aldrei aftur á lífi.
Danny bjó skammt frá heimili Jacobs í Annandale þegar atburðurinn átti sér stað. Áður og eftir að Jacob var numinn á brott höfðu fleiri óhugnanleg atvik komið upp í bænum og nágrenni hans. Fjölmargir ungir drengir höfðu tilkynnt lögreglu um mann sem elti þá, káfaði á þeim og sýndi kynferðislega tilburði. Lýsingin á þeim manni þótti svipa til útlits barnaníðingsins Danny James Heinrich, en hann neitaði ávallt sök.
Hvarf Jacobs átti eftir að hafa mikil áhrif, en fimm árum eftir hvarf hans var lögum komið á sem skylduðu dæmda barnaníðinga til að skrá sig á þar til gerðan lista yfir dæmda kynferðisbrotamenn. Var það móðir Jacobs, Patty Wetterling, sem barðist mjög fyrir þessu.
Leitin að Jacob á sínum tíma skilaði engum árangri þrátt fyrir að lögregla hafi fengið þúsundir ábendinga. Í frétt AP segir að Danny hafi játað glæpinn fyrir lögreglu á dögunum. Hann sagði að hann hefði ekið drengnum á afvikinn stað þar sem hann braut gegn honum kynferðislega. Þá sagðist hann hafa ætlað að aka honum áleiðis heim, en þegar Jacob fór að gráta hafi fát komið á hann. „Ég dró upp byssuna, hlóð hana og sagði Jacob að snúa sér við,“ sagði hann við yfirheyrslur. Hann játaði að hafa skotið drenginn tvisvar áður en hann gróf líkið.
