Fjögur þúsund sinnum sterkari en Tabasco-sósa – „Ég er ekkert mjög hrifinn af sterkum mat“
Breskur kokkur, Ben Sumadiwiria, varð missti tímabundið heyrn eftir að hafa borðað sterkustu núðlur í heimi. Núðlurnar eru fjögur þúsund sinnum sterkari en Tabasco-sósa, sem Íslendingar þekkja margir hverjir. Hann missti heyrnina í um tvær mínútur eftir að hafa snætt réttinn.
Maðurinn, sem við skulum kalla Ben frekar en Sumadiwiria, er 22 ára og býr í London. Hann er vanur að borða sterkan mat – mjög sterkan meira að segja – og stóðst ekki mátið þegar hann var á ferð um Indónesíu. Á veitingastað í Jakarta rakst hann á rétt sem átti að slá öll met. Rétturinn heitir „Death noodles“ eða dauðanúðlur. Rétturinn inniheldur 100 kramda chili-ávexti eða það sem kallað er bird‘s eye chilies.
Rétturinn skorar 20 milljón stig á Schoville-skalanum, sem er mælikvarði á styrkleika. Til samanburðar má nefna að Tabasco-sósan bragðmikla skorar fimm þúsund stig.
Þegar Ben hóf átið byrjaði hann að svitna, eins og þeir sem krydda vel þekkja. Svo fór hann að svima. „Þetta var klárlega það sterkasta sem ég hef nokkru sinni látið inn fyrir mínar varir,“ segir kokkurinn við breska blaðið Mirror. „Eftir nokkrar sekúndur var ég farinn að svitna og mér varð óglatt.“
Hann ber að allir sem prófað hafa réttinn hafi kastað upp á veitingastaðnum eða fyrir utan hann. „Þetta heita dauðanúðlur en mér er sagt að sumir innfæddir geti klárað heilan disk – sem er bara sturlað.“ Hann segist hafa komist að því að um sé að ræða sterkasta rétt á matseðli sem völ er á. „Ég er ekkert mjög hrifinn af sterkum mat en þegar einhver skorar á mig get ég ekki skorast undan.“
Ben, sem á indónesíska foreldra, segir að munnur og varir hans hafi logað klukkustundum saman eftir að hann borðaði matinn. Honum varð mjög óglatt, sjóðheitt og mátti kæla höfuðið undir krana dágóða stund. Hann drakk sex vatnsglös, mjólkurhristing og kældan banana en leið enn illa af bruna í munninum. Hann missti heyrn í um tvær mínútur áður en hann skilaði öllu saman úti á götu. „Maður finnur eiginlega ekkert bragð – þetta er bara hiti og svolítill keimur af núðlum.“
Hann segist hafa dofnað í kjaftinum og ekki fundið fyrir tungu og vörum. „Ég hef borðað wasabi og ýmiss konar sterkan mat en þetta slær öllu við.“
Í grein Mirror kemur fram að The Carolina Reaper sé sterkasta chili í heimi en þegar búið er að kremja saman marga chili-ávexti af annarri tegund, náist fram meiri styrkleiki.
Hægt er að fylgjast með ævintýrum Ben á Youtube, en þar leggur hann sér ýmislegt til munns, svo sem blóð úr cobra-slöngu auk þess sem hann tekur þátt í kappáti.
