Dómstóll í Osló í Noregi hefur dæmt þrjátíu og eins árs karlmann í átta ára fangelsi fyrir að beita fjögurra vikna dóttur sína skelfilegu ofbeldi. Stúlkan mun að líkindum þurfa að búa við mjög skert lífsgæði það sem eftir er.

Dómurinn var kveðinn upp í gær en auk þess að sæta átta ára fangelsi þarf maðurinn að greiða dóttur sinni tíu milljónir norskra króna, eða tæpar 140 milljónir króna á núverandi gengi, í bætur. Móðir stúlkunnar var einnig sakfelld í sama máli en hún var dæmd fyrir að koma dóttur sinni ekki undir læknishendur. Hún var dæmd í tíu mánaða fangelsi.

Faðir og móðir stúlkunnar hafa ávallt neitað sök. Faðirinn sagðist hafa gefið dóttur sinni olnbogaskot óvart þegar stúlkan svaf í sama rúmi og hann. Rannsókn lækna leiddi hins vegar í ljós að áverkarnir væru það miklir að engar líkur væru á því að olnbogaskoti væri um að kenna.

Í ákæru kom fram að afleiðingar meiðslanna sem stúlkan hlaut væru það alvarlegar, að stúlkan þyrfti að líkindum á aðstoð að halda við allar sínar daglegu athafnir um ókomin ár. Stúlkan höfuðkúpubrotnaði, viðbeinsbrotnaði og varð auk þess fyrir miklum heilaskaða.

Átján dagar liðu þar til foreldrar stúlkunnar komu henni undir læknishendur. Og þegar það gerðist grunaði lækna strax að eitthvað saknæmt hefði átt sér stað þar sem lýsingar foreldranna á því sem gerðist komu ekki heim og saman við þá alvarlegu áverka sem stúlkan var með. Lögregla handtók foreldranna á sjúkrahúsinu þennan sama dag.

Foreldrarnir eru innflytjendur frá Sómalíu og sagði móðirin að ástæður þess, að hún fór ekki með dóttur sína til læknis, mætti rekja hefða í heimalandi hennar. Það hefði verið í verkahring föðurins að taka slíka ákvörðun. Þá sagðist hún hafa óttast mann sinn, hann hefði áður beitt hana ofbeldi og óttaðist að hann myndi gera það aftur ef hún gerði ekki það sem hann segði.

Faðir stúlkunnar hefur áfrýjað dómnum.