Tuttugu og fjögurra ára karlmaður, Alexandro Garibaldi, er bak við lás og slá eftir að hafa skotið frænda sinn, hinn tuttugu og þriggja ára Joaquin Mendez.

Það var á laugardag sem Alexandro og og Joaquin fundu skothelt vesti. Málavextir liggja ekki nákvæmlega fyrir, en samkvæmt Tampa Bay Times ákváðu frændurnir að athuga hvort vestið myndi virka. Joaquin klæddi sig í vestið og Alexandro skaut úr skammbyssu sem hann var með á sér.

Það er óhætt að segja að þessi hættulegi leikur hafi endað með ósköpum því Joaquin var fluttur lífshættulega slasaður á sjúkrahús þar sem hann lést af sárum sínum. Að sögn lögreglu fór kúlan í gegnum vestið með fyrrgreindum afleiðingum.

Garibaldi sagði við yfirheyrslur hjá lögreglu að hann hefði komið að frænda sínum særðum. Vitni eru þó sögð hafa bent á hann sem geranda og er hann nú í fangelsi þar sem hann á yfir höfði sér ákæru vegna manndráps.