Arline vildi ekki missa Norman – Hann vildi losna við hana
Að morgni mánudagsins 23. júlí, 2012, komu Kimberly Simmons og móðir hennar, Dawn Benner, að heimili Arline Lawless í Waldoboro í Maine í Bandaríkjunum. Arline deildi húsinu með eiganda þess, Jeremy McPhee. Þannig var mál með vexti að bróðir Kimberly, Norman Benner, hafði um fjögurra mánaða skeið átt í ástarsambandi við Arline Lawless, en þegar þarna var komið sögu var hann þeirrar skoðunar að sambandið hefði runnið sitt skeið.
Hafði Norman sagt móður sinni, sem hann reyndar bjó hjá, að Arline væri orðin helst til kæfandi og ætti það meðal annars til að vekja hann um miðja nótt og spyrja hvort hann hygðist fara frá henni. En sem sagt, þennan morgun fundu mæðgurnar Norman og Arline alblóðug í rúminu í svefnherberginu.
Norman hafði reynt að slíta sambandinu við Arline föstudaginn 20. júlí, en uppskorið heiftarlegt rifrildi og hann varð frá að hverfa. Daginn eftir ákvað hann að leiða málið til lykta og sagði móður sinni að hann yrði kominn heim aftur eftir klukkustund, eða svo.
Einnig hafði Arline sent Norman fjölda smáskilaboða og lýst áhyggjum vegna „undarlegrar hegðunar, Jeremys. Norman taldi að skilaboðin væru yfirvarp; Arline vildi einfaldlega fá hann til sín.
En Norman skilaði sér ekki heim, dagurinn varð að nótt og nýr dagur rann upp, en ekkert bólaði á Norman. Fylltust foreldrar hans og systir miklum áhyggjum og mæðgurnar fóru, sem fyrr segir, á heimili Arline og komust að því að áhyggjurnar áttu rétt á sér.
Við fyrstu sýn virtist Kimberly og Dawn að skötuhjúin væru bæði liðið lík, en skyndilega hreyfði Arline höfuðið. Það gerði Kimberly og Dawn bylt við og þær nánast hlupu út úr svefnherberginu og hringdu í Neyðarlínuna.
Jeffrey Fuller úr lögreglunni í Waldoboro mætti fyrstur á staðinn og gat staðfest að Norman hafði verið skotinn í hnakkann og þurfti ekki að kemba hærurnar. Arline var særð, gat ekki gert sig skiljanlega og var flutt með hraði á sjúkrahús í Portland.
Síðar staðfesti réttarmeinafræðingur að Norman hafði verið skotinn af stuttu færi.
Ekki lá fyrir hvenær um helgina þessi blóðuga uppákoma átti sér stað, en Jeremy McPhee sagði lögreglunni að hann hefði síðast séð Arline og Norman á laugardeginum og hefði klukkan hálf átta það kvöld heyrt það sem hann ályktaði að væru hrotur berast frá herbergi þeirra.
Hvað sem öllu þessu líður þá var Arline útskrifuð af sjúkrahúsinu á miðvikudeginum og umsvifalaust handtekin. Hún hafði enda, strax á mánudeginum, gefið eiðsvarna yfirlýsingu á sjúkrabeðinum þess efnis að hún hefði skotið Norman því hún hefði óttast að hann yfirgæfi hana.
Fimm mínútum eftir að hún myrti Norman skaut hún sjálfa sig í höfuðið, en skotið var, eins og lesendur ættu nú ekki að velkjast í vafa um, ekki banvænt. Þann 25. júlí, 2013, var Arline Lawless dæmd til 35 ára fangelsisvistar.