Undanfarinn sólarhringur eða svo hefur verið viðburðaríkur í lífi einræðisherra Norður-Kóreu, Kim Jong-un. Eins og greint hefur verið frá sprengdu Norður-Kóreumenn kjarnorkusprengju í fyrrinótt og nú berast fregnir af því að einræðisherrann hafi bannað kaldhæðni í landinu.
Breska blaðið Independent fjallar um þetta og segir að bannið eigi við þegar landsmenn ræða sín á milli um leiðtoga þjóðarinnar, títtnefndan Kim Jong-un.
Jafnvel óbein gagnrýni á yfirvöld hefur verið bönnuð, en Independent vísar í fréttir Radio Free Asia í Suður-Kóreu. Samkvæmt þessum sömu fréttum var þessi nýjung kynnt landsmönnum ekki alls fyrir löngu. Var það gert á fjölmörgum fjöldasamkomum sem haldnar hafa verið í landinu að undanförnu.
Svo virðist vera sem almenningur í Norður-Kóreu sé hægt og bítandi að opna augu fyrir því ástandi sem ríkir í landinu. Þannig megi greina aukningu í tilfellum þar sem almenningur sýnir mótþróa eða sýnir í verki að það sé ósammála þeirri stefnu sem yfirvöld í Norður-Kóreu hafa tekið, til dæmis með algjörri einangrunarstefnu frá alþjóðasamfélaginu. Þannig hafi til dæmis tilfelli veggjakrots aukist í landinu þar sem yfirvöldum er sendur tónninn.