Slökkvilið kallað til eftir skelfilega ákvörðun ungs Norðmanns
Tvítugur Norðmaður, Cato Berntsen Larsen, tók á föstudag líklega einu verstu ákvörðun sem hann hefur tekið.
Vinur Cato hafði lent í þeirri leiðinlegu lífsreynslu að tapa snjallsímanum sínum á útikamar í bænum Drammen, skammt frá Osló. Síminn datt ofan í tankinn sem geymir öll herlegheitin.
Vinurinn hafði að líkindum talið að ómögulegt væri að endurheimta símann, en því var fyrrnefndur Cato ósammála.
Cato brá á það ráð að troða sér ofan í tankinn og finna símann. Þótt ótrúlegt megi virðast komst hann ofan í, en þegar kom að því að komast á þurrt á nýjan leik reyndist það honum þrautin þyngri.
Eftir að hafa setið fastur ofan í kamrinum í um klukkustund var brugðið á það ráð að fá slökkviliðið á staðinn. Cato var bjargað og er óhætt að segja að hann hafi verið frelsinu feginn.
„Við reyndum fyrst að ná í símann með priki en það virkaði ekki. Þannig að ég stökk ofan í,“ segir Cato í samtali við VG í Noregi. „Ég var þarna í um klukkutíma og var að fara yfir um. Það voru allskonar pöddur sem skriðu á mér,“ bætir hann við.
Cato kveðst hafa upplifað yfirgengilega ógleði meðan á þessum ósköpum stóð – og skyldi engan undra. Að sögn Tinu Brock, hjá slökkviliðinu í Drammen, tóku fjórir slökkviliðsmenn þátt í aðgerðunum.
Þess má geta að kamarinn er tæmdur einu sinni á ári.