Wadi al-Salam-kirkjugarðurinn í Írak er stærsti kirkjugarður heims en talið er að þarna séu að finna jarðneskar leifar fimm milljóna manna. Forsvarsmenn kirkjugarðsins glíma nú við ákveðið vandamál sem gæti reynst erfitt að vinna bug á.

Átökin í Mið-Austurlöndum á undanförnum árum, Írak þar á meðal, hafa kostað tugþúsundir lífið. Wadi al-Salam-kirkjugarðurinn á sérstakan stað í hjörtum sjía-múslima þar sem hann liggur nærri grafhýsi Ali Bin Abi Talib sem var frændi Múhammeðs spámanns. Samkvæmt trúarkenningum sjíta var Ali arftaki Múhameðs. Þessari túlkun eru súnní-múslimar ekki sammála en það er efni í aðra og lengri sögu.

Kirkjugarðurinn er tíu ferkílómetrar að stærð, en eftir að ISIS, hryðjuverkasamtökin sem kenna sig við íslamskt ríki, fóru að láta til sín taka á stórum svæðum í Írak með tilheyrandi mannfalli hefur kirkjugarðurinn fyllst. Nú er svo komið að um 200 einstaklingar eru grafnir í garðinum á degi hverjum í samanburði við 80 manns að jafnaði áður en ISIS-samtökin fóru að láta til sín taka.

Forsvarsmenn kirkjugarðsins hafa reynt að finna lausnir á vandanum, meðal annars með því að hækka verð fyrir grafir. Hefðbundið 25 fermetra grafhýsi kostar nú sem nemur 450 þúsund krónum. Það eru ekki bara Írakar sem láta grafa sig í Wadi al-Salam. Garðurinn er einnig hvíldarstaður fjölmargra Írana sem eru sjía-múslimar.