Frönsku hjónin Pierre og Eliane Thivillon ganga skrefinu lengra þegar kemur að gæludýrahaldi. Seinustu 18 árin hafa þau nefnilega deilt heimili sínu með górillunni Digit- sem nú virðist ætla að taka fram úr foreldrum sínum í stærð.

Hjónin eru búsett vestur af Lyon og reka þau athvarf fyrir dýr sem bjargað hefur verið frá bágum aðstæðum í dýragörðum og fjölleikahúsum. Ein af þeim er Digit, en hún var yfirgefin þegar hún var ungi og vó aðeins rúmlega kíló þegar hjónin, sem eru barnlaus, tóku hana sér.

Ákváðu þau í kjölfarið að ala hana upp og komu upp aðstöðu fyrir Digit nálægt heimili sínu. Segja þau ýmislegt hafa gengið á í uppeldinu á Digit sem sé bæði ljúf og fjörmikil. Sérstaklega hafi það reynt krefjandi þegar Digit tók tímabil þar sem hún vildi stöðugt vera að hoppa ofan á rúminu hjá mömmu sinni og pabba.

Á meðan Digit var yngri komust foreldrar hennar aldrei í burtu frá henni. Tók hún svo miklu ástfóstri við þau að hún varð miður sín þegar þau skildu hana eftir og segja þau hjónin að þegar Digit verði leið þá gildi það sama um þau.

Þau hafa því ekki farið í frí, út að borða, í bíó eða í leikhús svo árum skiptir. Þau sjá þó fram á að það fari að breytast innan tíðar þar sem að Digit er í dag mun sjálfstæðari en áður. Hún þarfnast þó enn aðstoðar við einstaka verk, eins og til dæmis að draga mat úr tönnunum á sér.