Richard hvarf frá eiginkonu og börnum árið 1993 – Úrskurðaður látinn 2003 – Upp komast svik um síðir
Sextíu og þriggja ára karlmaður hefur verið ákærður eftir að í ljós kom að hann stal auðkennum manns, Terry Symansky, sem drukknaði árið 1991. Maðurinn sem um ræðir heitir Richard Hoegland en undanfarin tuttugu ár hafði hann notast við nafn Terrys.
Það var árið 1993 að Richard lét sig hverfa frá eiginkonu og fjórum börnum þar sem þau bjuggu í Indiana í Bandaríkjunum. Ekkert heyrðist frá Richard eftir þetta og árið 2003 var gefið út dánarvottorð.
Það var ekki fyrr en á þessu ári að upp komst um svikin. Það gerðist eftir að frændi Terrys, mannsins sem drukknaði árið 1991, heimsótti vefinn Ancestry.com þar sem hann rak augun í hjúskaparvottorð sem gefið hafði verið út á nafni Terrys – eftir að hann lést. Það kom frændanum skiljanlega spánskt fyrir sjónir og eftir þetta fóru hjólin að snúast.
Í ljós kom að Richard hafði notast við nafn og auðkenni Terrys í rúm tuttugu ár. Hann virðist hafa flúið frá Indiana til Flórída þar sem hann kynntist konu, kvæntist á nýjan leik og eignaðist með henni son.
Að því er Fox 13 Tampa Bay greinir frá sagði Richard við fyrri eiginkonu sína, skömmu áður en hann hvarf, að hann þyrfti að láta sig hverfa þar sem bandaríska alríkislögreglan, FBI, væri á eftir honum. Sagðist hann hafa stolið peningum og hann myndi að óbreyttu lenda í fangelsi. Þegar hann var handtekinn fyrir skemmstu sagði hann við yfirheyrslur að það hefði allt saman verið lygi – hann hafi látið sig hverfa til að komast í burtu frá eiginkonu sinni og fjölskyldu.
Svo virðist vera sem Richard hafi tekið upp nafn Terrys eftir að hann kynntist föður hans, Edward Symansky. Edward þessi hafði auglýst eftir herbergisfélaga og var það Richard sem svaraði auglýsingu hans eftir að hann flúði til Flórída. Tók hann upp nafn Terrys í kjölfarið og notaðist við það um margra ára skeið.
í frétt Tampa Bay Times kemur fram að fjölskylda Richards í Flórída hafi verið verulega brugðið þegar svikin komust upp. Svo virðist vera sem seinni eiginkona Richards, sem hann kvæntist árið 1995, hafi ekki haft hugmynd um forsöguna. Richard situr nú í fangelsi í Tampa og á að líkindum yfir höfði sér fangelsisdóm. Að sögn lögreglu þykir málið það sérstakt að ekki liggur fyrir með nákvæmum hætti að svo stöddu hvaða lög, önnur en lög um auðkennisþjófnað, Richard braut.
Málið þykir allt hið undarlegasta og vekur það athygli hversu lengi svikamyllan stóð yfir. Í frétt Tampa Bay Times er rætt við lagaprófessorinn Gerry Beyer, sem sérhæfir sig í auðkennisþjófnaði, og segir hann málið eitt það ótrúlegasta sem hann hafi kynnst. Hann sé í raun heillaður. Bendir hann á að í langflestum tilfellum steli einstaklingar auðkennum annarra í þeim tilgangi að hagnast fjárhagslega. Það virðist ekki hafa verið markmið Richards. Hann segir að í ljósi þess að Terry hafi verið ókvæntur og barnlaus þegar hann lést, 33 ára gamall, hafi hann í raun verið fullkominn kandídat fyrir Richard.
Gerry veltir því einnig fyrir sér hvernig Richard fór að því að fara huldu höfði jafn lengi og raun ber vitni og bendir á að á einhverjum tímapunkti hefðu viðvörunarbjöllur átt að hringja. Skattar, kennitala (e. Social security number), bankareikningar og fleira ættu undir venjulegum kringumstæðum að koma upp um auðkennisþjófa. Gerry bendir þó á að ef Richard hafi ekki átt kreditkort og notast við kennitölu eiginkonu sinnar, til dæmis við skattgreiðslur, fasteignakaup og fleira, hafi hann getað nýtt sér glufur í kerfinu. Þá naut hann góðs af því að hafa tekið upp auðkenni Terrys áður en flest opinber skjöl komust á stafrænt form.