Skissan Hér sést skissan sem Thomas hannaði árið 1992. Hann sótti um einkaleyfi í nóvember það ár en hætti að greiða af því árið 1995.

Bandaríkjamaður að nafni Thomas Ross hefur stefnt hugbúnaðarrisanum Apple og krefst þess að fyrirtækið greiði honum 10 milljarða Bandaríkjadala, jafnvirði 1.240 milljarða króna. Ástæðan er sú að hann telur fyrirtækið hafa stolið frá honum skissum síðar voru notaðar við hönnun iPhone-snjallsímanna.

Umræddar skissur segist Thomas hafa gert árið 1992 og eins og meðfylgjandi myndir sínar minna þær um margt á útlit iPhone-snjallsímanna sem hafa selst í bílförmum á undanförnum árum.

Í frétt The Daily Dot, sem fjallar um málið, kemur fram að Thomas hafi sótt um einkaleyfi á hönnuninni í nóvember 1992. Það er eitthvað sem gæti komið honum að gagni í málsókninni en þar sem hann hætti að greiða af einkaleyfinu rann það úr gildi árið 1995. Nokkuð mörgum árum síðar komu fyrstu iPhone-símarnir á markað.

Í stefnunni segist Thomas hafa orðið fyrir „stórfelldu tjóni“ sem varla er hægt að meta til fjár. Samt sem áður fer hann fram á tíu milljarða Bandaríkjadala í stefnunni auk þess sem hann fer fram á að fá 1,5 prósent af veltu Apple vegna sölu á iPhone-símum og iPad-spjaldtvölum.

Í stefnunni fer Thomas fram á það að málið fari fyrir kviðdóm sem þýðir að tólf óbreyttir borgarar í Flórída muni leggja mat á málið. Alls er óvíst er hvort Thomas verði ágengt með stefnunni en það verður þó forvitnilegt að fylgjast með framvindu málsins.