Ian Huntley var sakleysið uppmálað þegar Holly og Jessica hurfu
Í febrúar 1999 lágu leiðir Ians Huntley og 22 ára konu, Maxine Carr, saman í Grimsby á Englandi. Þau fluttu til þorpsins Soham í Cambridgeskíri. Maxine Carr fékk starf sem skólaliði í St. Andrew-grunnskólanum en Ian Huntley landaði, þegar upp var staðið í nóvember 2001, stöðu húsvarðar við Soham Village College.
Þess er vert að geta að Huntley hafði fyrir þennan tíma sætt rannsókn vegna kynferðisglæpa og innbrota.
Af Maxine er það að segja að með henni og tveimur tíu ára stúlkum í grunnskólanum, Holly Wells og Jessicu Chapman, tókust ágætis kynni. Helgina 3.–4. ágúst 2002 dró til tíðinda. Maxine skrapp til Grimsby til að heimsækja móður sína en Ian Huntley varð eftir – aleinn heima í húsvarðarbústaðnum þar sem þau höfðu búið sér heimili.
Um klukkan 17.00, 3. ágúst, voru Holly og Jessica í grillveislu heima hjá Holly. Upp úr klukkan sex fóru þær úr veislunni til að kaupa sér sælgæti og var gengið fram hjá heimili Huntleys og Maxine.
Talið er að Huntley hafi talið stúlkurnar á að koma inn, þrátt fyrir að Maxine væri ekki heima.
Hvað sem þeim vangaveltum líður þá er ljóst að korter yfir sex síðdegis 3. ágúst myrti Huntley Holly og Jessicu. Í áðurnefndri grillveislu og hafði verið tekin af þeim stúlkunum íklæddum Manchester United-peysum. Sú ljósmynd átti síðar eftir að verða táknræn fyrir málið allt.
Huntley losaði sig við líkin í ræsi í um 30 kílómetra fjarlægð, skammt frá athafnasvæði Konunglega breska flughersins í Lakenham í Suffolk.
Huntley bar eld að líkunum í tilraun til að eyðileggja allt sem hugsanlega gæti bendlað hann við ódæðið.
Þegar ljóst var að stúlkurnar væru horfnar birti lögreglan áðurnefnda ljósmynd, en næsta hálfa mánuðinn bar fátt til tíðinda. Nema hvað Huntley kom fram í nokkrum sjónvarpsviðtölum og talaði um það reiðarslag sem dunið hefði á þessu litla samfélagi. Einnig tók Huntley þátt í leitinni að stúlkunum og dró hvergi af sér.
Lík Holly og Jessicu fundust sem sagt hálfum mánuði eftir að þær hurfu og í kjölfarið voru Ian Huntley og Maxine Carr handtekin. Reyndar höfðu sjónir lögreglunnar beinst að Huntley nokkru fyrr og við leit á heimili hans fundust vísbendingar sem renndu enn frekar stoðum undir grunsemdir lögreglunnar.
Réttarhöldin yfir skötuhjúunum hófust 5. nóvember, 2003, og Huntley stóð frammi fyrir tveimur morðákærum. Maxine, sem hafði ekki vitneskju um hvað kærasti hennar hafði á samviskunni, var ákærð fyrir að leggja stein í götu réttvísinnar og aðstoða brotamann.
Miðvikudaginn 17. desember, 2003, féll dómur í málunum; Huntley fékk lífstíðardóm og Maxine var sýknuð af því að hafa aðstoðað brotamann, en fékk hins vegar þriggja og hálfs árs dóm fyrir að hafa veitt Huntley falsaða fjarvistarsönnun.
Maxine afplánaði 21 mánuð og segir ekki meira af henni. Huntley reyndi í þrígang að stytta sér aldur árið 2006. Í kjölfarið fengu fangaverðir þau fyrirmæli að umgangast hann sem fjölskyldumeðlim og láta honum þannig finnast að einhverjum væri annt um hann. Segir sagan.