„Það eina sem vinningurinn hefur haft í för með sér er að gera nána ættingja mína gráðuga og heimtufreka“
Gillian Bayford hélt að framtíðin yrði björt þegar hún komst að því að hún hefði unnið 148 milljónir punda, eða 26,3 milljarða króna, í Euromillions-lottóinu. Annað kom á daginn og nú er Gillian þeirrar skoðunar að vinningurinn hafi eyðilagt líf hennar.
Gillan, sem er 43 ára, skildi við eiginmann sinn, Adrian, fimmtán mánuðum eftir að hafa unnið þann stóra. Hjónin skiptu með sér milljónunum, eða milljörðunum, en eftir skilnaðinn sögðu þau að skjótfenginn gróðinn hefði sett aukna pressu á hjónabandið sem að lokum varð þeim um megn.
Ekki nóg með að hjónabandið hafi farið í vaskinn heldur er grunnt á því góða á milli Gillian og foreldra hennar. Þau hafa ekki talað við hana í um ár og þá er hún heldur ekki lengur í sambandi við bróður sinn. Gillian sagði sögu sína í viðtali við breska blaðið The Sun þar sem hún bendir á að foreldrar sínar og bróðir gangi um með fulla vasa fjár – þökk sé henni. Þau eigi flotta bíla og flott hús en þrátt fyrir að hafa létt undir með þeim fjárhagslega geri þau kröfu um að hún komi þeim til bjargar ef þau þarfnast peninga.
„Peningarnir áttu að gera alla hamingjusama. En það eina sem vinningurinn hefur haft í för með sér er að gera nána ættingja mína gráðuga og heimtufreka,“ segir. Hún nefnir til dæmis að faðir hennar ferðist ekki lengur um í almennu farrými þegar hann fer í flug. Þess í stað greiði hann fúlgur fjár fyrir ferðalög á fyrsta farrými með peningum sem hún útvegaði honum.
Eftir að hún vann þann stóra ákvað Gillian að hjálpa foreldrum sínum og bróður fjárhagslega. Þau voru ekki beint vel stæð og voru vafin skuldum eftir fyrirtækjarekstur sem gekk ekki upp. Þegar Gillian vann milljarðana bjuggu foreldrar hennar í hjólhýsi og ákvað hún að létta undir með þeim og kaupa handa þeim íbúð.
Nokkrum mánuðum síðar segir Gillian að foreldrar hennar hafi beðið hana um 800 þúsund pund, 140 milljónir króna, svo bróðir hennar gæti stofnað fyrirtæki. Hún lét undan en síðan þá segir Gillian að bróðir hennar hafi ekki talað við hana. Í viðtalinu kemur fram að allt í allt hafi hún látið um 20 milljónir punda af hendi rakna til fjölskyldu sinnar, en samt sem áður virðist sem foreldrar hennar og bróðir geri þá kröfu að hún komi þeim til bjargar. Nú þegar Gillian ákvað að láta gott heita segir hún að fjölskylda hennar hafi hætt að tala við hana. Í samtali við The Sun segir faðir hennar að það sé ekki allskostar rétt að þau krefjist þess að hún gefi þeim peninga. Þvert á móti hafi hún verið allt of örlát.
Hvað sem því líður er ljóst að afleiðingarnar af lottóvinningnum eru þær að hún er nú skilin við eiginmann sinn auk þess sem sambandið við fjölskyldu hennar, það er foreldra og bróðir, er stirt.
