Nýir þættir hefja göngu sína í Bretlandi – Piers Morgan ræðir við glæpakvendi
„Þetta var ekki beint eins og að taka viðtal við Simon Cowell eða Elton John,“ segir breski sjónvarpsmaðurinn Piers Morgan um nýja þætti sem hefja göngu sína í Bretlandi í næstu viku. Þættirnir sem um ræðir heita Killer Women, en eins og nafnið gefur til kynna fjalla þær um konur sem gerst hafa sekar um morð.
Í fyrsta þættinum fjallar Morgan meðal annars um mál ungrar stúlku, Erin Caffey, sem var aðeins sextán ára þegar hún tók þátt í að skipuleggja morð á fjölskyldu sinni. Málið vakti gríðarlega athygli í Bandaríkjunum þegar það kom upp, meðal annars vegna þess hversu hrottafenginn glæpurinn var.
Morgan, sem hefur komið víða við á löngum ferli sínum í fjölmiðlum, segir í viðtali við breska blaðið Mirror að viðtalið við Erin hafi verið átakanlegt. „Maður er að taka viðtal við einhvern sem hefur gerst sekur um skelfilegan glæp. Þú ert einum metra frá viðkomandi. Ég get ekki sagt að ég hafi óttast um líf mitt því það voru fangaverðir viðstaddir. En þú veist að þú ert að horfa í augun á einhverjum sem er illa innrættur. Hún er versta kona sem ég hef hitt um ævina,“ segir hann.
Sem fyrr segir vakti mál Erin mikla athygli í árið 2008. Hún virtist ósköp venjuleg stúlka sem átti aldrei við agavanda að stríða á sínum yngri árum. Þvert á móti var hún dugleg í skóla og kirkjurækin eins og fjölskylda hennar. Þegar Erin var sextán ára kynntist hún eldri strák, Charlie Wilkinson, 19 ára, og voru foreldrar Erinar, Terry og Penny Caffey, mótfallnir því að hún væri í sambandi með eldri strák. Þau reyndu þó að umbera það eins og þeim var frekast unnt.
Átta ára bróðir Erin, Tyler, lék á gítar og Matthew, 13 ára bróðir hennar, lék á munnhörpu og var Penny organisti í kirkjunni. Sjálf hafði Erin verið í kórnum allt þar til hún kynntist téðum Charlie.
Tveimur tímum eftir miðnætti þann 1. mars, 2008, ruddust tveir ungir menn inn á heimili Caffey-fjölskyldunnar í Alba í Texas og gengu berserksgang. Þegar upp var staðið voru Penny, Tyler og Matthew liðin lík og Terry á milli heims og helju. Ódæðismennirnir báru síðan eld að innanstokksmunum og yfirgáfu húsið. Terry, sem hafði verið skotinn mörgum skotum, tókst einhvern veginn að dragnast út úr húsinu áður en það varð alelda og skríða að heimili nágranna síns sem hafði samband við lögreglu. Fljótlega kom í ljós að Erin hafði verið viðriðin glæpinn en Charlie, vinur hans að nafni Allen Waid og kærasta Allens, Bobbi Gale Johnson, höfðu séð um að fremja ódæðið. Erin hafði séð um skipulagninguna.
Ég á von á því að áhorfendur muni einmitt hugsa það, hvernig hún gat gert þetta?
Í október 2008 voru Charlie og Allen dæmdir til lífstíðarfangelsis án möguleika á reynslulausn. Þremur mánuðum síðar játuðu Erin og Bobbi sig sekar um morð . Bobbi fékk tvöfaldan 40 ára dóm og getur sótt um reynslulausn eftir 25 ára afplánun. Erin hins vegar tvo samhangandi lífstíðardóma og 25 ár að auki en getur sótt um reynslulausn eftir 40 ára afplánun.
Sem fyrr segir benti fátt til þess að Erin myndi feta braut glæpa, hvað þá að hún gæti skipulagt jafn skelfilegan glæp og raun bar vitni. Piers Morgan segir að það sé nákvæmlega það sem gerir hana hættulega. Ekki sé allt sem sýnist.
„Ég á von á því að áhorfendur muni einmitt hugsa það, hvernig hún gat gert þetta?“
Þættirnir verða frumsýndir á ITV-sjónvarpsstöðinni í Bretlandi þann 11. maí næstkomandi.
