Tók hann langan tíma að venjast einsemdinni
Liu Shengija hefur síðastliðinn áratug búið einn í þorpinu Xuenshanshe í Kína. Þorpið sem um ræðir er í norðvesturhluta Gansu-héraðs.
Að sögn Liu bjuggu eitt sinn tuttugu fjölskyldur í þorpinu. Þeim fór fækkandi á síðari hluta 20. aldar, eða allt þar til Liu var einn eftir. Sumir fluttu í leit að betra lífi áður en aðrir dóu á gamals aldri.
Síðan árið 2006 hefur Liu átt heima einn í þorpinu, eða síðan eftir dauða móður hans og yngri bróður. Sömuleiðis fluttu síðustu íbúar þorpsins á brott þetta árið. Liu vandist einsemdinni og lærði að bjarga sér á eigin spýtur.
„Fyrst um sinn var erfitt að sofna á nóttunni á meðan ég heyrði gólið í hundunum hér úti,“ sagði Liu í samtali við People’s Daily sem bætir við að hann hafi félagsskap af búfénaði. Það hafi þó tekið langan tíma að venjast því að vera einn.
Liu starfar sem eftirlitsmaður á svæðinu, en um er að ræða hlutastarf. Þá fylgist hann með skóglendinu í nágrenni bæjarins og þannig nær hann endum saman. Fyrir þetta fær hann um 700 yuan á mánuði, sem eru rúmar 13.000 krónur.
„Að búa hér er ekki vandamál fyrir mig. Ég stefni að því samt sem áður að flytja á stað þar sem fleiri búa,“ sagði hann.
Þrátt fyrir einmanaleikann sagði Liu við blaðamann People Daily, það vera nokkrum kostum búið að hafa heilt þorp út af fyrir sig. Hann gæti til dæmis valið hús til að búa í, en þess má geta að mörg húsanna hafa enn að geyma hluti frá fyrri eigendum þeirra.
