Maurar gera stúlkunni lífið leitt – Háls-, nef- og eyrnalæknir aldrei séð annað eins
Shreya Darji er ósköp venjuleg tólf ára stúlka sem býr ásamt fjölskyldu sinni í bænum Banskantha á Indlandi. Shreya þjáist hins vegar af kvilla sem ekki einu sinni læknar hafa fundið lausn á. Á hverjum degi skríða um tíu maurar út úr öðru eyra stúlkunnar.
Í frétt Huffington Post kemur fram að stúlkan hafi kvartað við foreldra sína í ágústmánuði í fyrra vegna óþæginda í öðru eyra sínu. Faðir hennar, Sanjay Darji, fór með dóttur sína til læknis þar sem 9-10 maurar voru fjarlægðir. Læknar töldu að maur hefði komist inn í eyrað og verpt eggjum sínum þar með fyrrgreindum afleiðingum.
Stúlkan hélt hins vegar áfram að finna fyrir óþægindum í eyranu. Foreldrar hennar fóru þá með hana til Jawahar Talsania, háls-, nef- og eyrnalæknis. Þar kom í ljós að læknum hafði ekki tekist að lækna stúlkuna og segir Talsania að hann hafi aldrei séð annað eins á 32 ára ferli sínum sem læknir.
Í viðtali við Huffington Post í lok janúar sagði Talsania að hann hefði dregið tíu stóra maura úr eyra stúlkunnar. „Þetta mál er mikil áskorun fyrir mig enda hef ég aldrei séð neitt þessu líkt,“ segir læknirinn sem reynt hefur ýmislegt til að drepa pláguna sem virðist vera búin að koma sér rækilega fyrir í eyra stúlkunnar. Shreya ku búa við ágætar aðstæður í heimabæ sínum.
„Við teljum ekki að maurar séu að verpa eggjum inni í eyranu því við höfum ekki séð nein merki um drottningu,“ segir Talsania sem er 58 ára. Hann segir að myndavél hafi þrædd inn í eyrað til að skoða aðstæður en ekkert óvenjulegt hafi fundist, nema maurar vitanlega. Stúlkan verður áfram undir eftirliti læknisins en faðir hennar er áhyggjufullur.
„Ég hef áhyggjur af framtíð hennar og hvernig þetta mun koma niður á henni, til dæmis í námi. Hún er frábær stúlka og hefur þegar misst mikið úr skólanum,“ segir faðirinn og bætir við dóttir sín verði vegna aðkasti frá samnemendum sínum.
Myndband sem tekið var af Talsania má sjá hér að neðan. Viðkvæmir eru varaðir við efni þess.
[youtube https://www.youtube.com/watch?v=zmon48Z72Ow&w=560&h=315]
