Tvö geimför safna ryki í yfirgefinni byggingu í eyðimörk Kasakstans
Í yfirgefinni og klunnalegri byggingu, langt inn í eyðimörk Kasakstans, er nokkuð sem fáir reikna með að rekast á á ferðum sínum um óbyggðir Mið-Asíu. Fyrir innan luktar dyr er ekki bara að finna eina heldur tvær rykfallnar geimflaugar sem Sovétmenn byggðu fyrir margt löngu.
Ljósmyndarinn Ralph Mirebs heimsótti þennan merkilega stað fyrir nokkrum misserum, en byggingin sem hýsir geimskutlurnar tvær er á Baikonur-svæðinu, hinu sama og Geimvísindastofnun Sovétríkjanna og síðar Rússlands hafði og hefur raunar enn aðsetur.
Baikonur-svæðið er sögufrægt en það var eitt það fyrsta og stærsta sinnar tegundar í heiminum. Uppbygging á svæðinu hófst á sjötta áratug tuttugustu aldar þegar geimferðarkapphlaup Bandaríkjanna og Sovétmanna fór af stað. Sovétmenn lögðu gríðarlegan metnað í að byggja svæðið upp og tókst það býsna vel enda var fyrsta mannaða geimfarinu, Vostok 1, skotið á loft frá Baikonur árið 1961.
Þó að Sovétmenn og síðar Rússar (sem leigja Baikonur-svæðið af Kasökum) hafi dregið úr útgjöldum til geimferða á síðustu árum er svæðið enn í fullri notkun þó þessi tiltekna bygging, sem fjallað er um hér að framan, megi muni fífil sinn fegurri. Síðustu áratugina hafa geimförin tvö safnað ryki og eru í dag lítið annað en minnisvarði um geimsögu Sovétmanna.
Geimförin voru smíðuð fyrir hina metnaðarfullu Buran-áætlun Sovétmanna sem sett var á laggirnar árið 1974 en slegin af árið 1993. Buran-áætlunin náði litlu flugi og var afraksturinn aðeins ein ómönnuð ferð út í geim árið 1988. Fjárskortur og pólitískur óstöðugleiki í Sovétríkjunum varð svo til þess að áætlunin var sett á ís stuttu síðar, áður en hún var formlega slegin af árið 1993 eftir ákvörðun Boris Yeltsin Rússlandsforseta.
Síðan þá virðast að minnsta kosti tvö af geimförum Buran-áætlunarinnar hafa gleymst í byggingunni á Baikonur-svæðinu.