Uppgjör á aðfangadagskvöld

Það var ekki vingjarnlegur, þriflegur jólasveinn sem knúði dyra hjá Ortega-fjölskyldunni.

Íklæddur jólasveinsbúningi lét hann kúlum rigna yfir fyrrverandi tengdafjölskyldu sína.
Bruce Pardo Íklæddur jólasveinsbúningi lét hann kúlum rigna yfir fyrrverandi tengdafjölskyldu sína.

Á aðfangadag 2008 klæddi Bruce Jeffrey Pardo sig í jólasveinsbúning. Síðan lá leið hans að heimili fyrrverandi tengdaforeldra hans í Covina í úthverfi Los Angeles í Bandaríkjunum.
En því fór fjarri að Bruce væri í jólaskapi þegar hann bankaði á dyrnar klukkan hálf tólf um kvöldið. Reyndar var hann með jólapakka í annarri hendi en í hinni var hann með hálfsjálfvirka skammbyssu. Að auki hafði hann þrjár viðlíka byssur í pússi sínu.

Skotið á allt sem hreyfist

Þegar dyrnar opnuðust kom átta ára stúlka hlaupandi til „jólasveinsins“ og skaut Bruce hana í andlitið (það skal strax tekið fram að stúlkan særðist en lifði af). Síðan lét hann kúlunum rigna yfir allt sem hreyfðist og var af nógu að taka því 25 manns voru í jólateitinni.

Leiða má líkur að því að Bruce hafi í sumum tilfellum staðið yfir sumum fórnarlömbunum og nánast tekið þau af lífi.
Þegar Bruce var búinn að skjóta nægju sína tók opnaði hann „jólapakkann“ sem hann hafði komið með. 

Fyrrverandi eiginkona Bruce var á meðal fórnarlambanna.
Sylvia Ortega Pardo Fyrrverandi eiginkona Bruce var á meðal fórnarlambanna.

Banvæn jólagjöf

Jólagjöf Bruce reyndist vera heimagerð eldvarpa og þegar hann hafði beitt henni var húsið alelda. Þegar upp var staðið höfðu níu manns misst lífið, annaðhvort vegna skotsára eða eldhafsins. Þrennt var sært; átta ára stúlka, sem áður er getið, 16 ára stúlka, sem hafði verið skotin í bakið, og 20 ára kona, sem ökklabrotnaði þegar hún stökk út um glugga á annarri hæð.

Það tók slökkviliðið hálfan annan tíma að ráða niðurlögum eldsins og þurfti að nota tannlæknaskýrslur til að bera kennsl á sum fórnarlambanna.

Á meðal hinna látnu voru fyrrverandi eiginkona Bruce, Sylvia, og tengdaforeldrar, Joseph og Alicia Ortega.

Bruce Pardo notaði heimagerða eldvörpu við morðin.
Í ljósum logum Bruce Pardo notaði heimagerða eldvörpu við morðin.

Breytt áform

Að árás lokinni fór Bruce úr jólasveinsbúningnum og íklæddist venjulegum klæðnaði. Síðan ók hann sem leið lá heim til bróður síns í Sylmar í tæplega 50 kílómetra fjarlægð. Þar fannst hann síðar, liðið lík eftir að hafa skotið sjálfan sig, fyrir mistök eða viljandi.

Bruce hafði keypt flugmiða til Kanada, en reyndar einnig til Illinois, með millilendingu í Minnesota. Talið var að hann hefði með þessu viljað villa um fyrir lögreglunni. En Bruce fór sem sagt hvergi og kann að vera að þriggja stigs brunasár á handleggjum hans hafi haft áhrif á fyrirætlanir hans. Innanklæða á honum fann lögreglan 17.000 dali sem verður að teljast álitleg upphæð.

Gildra í jólasveinsbúningi

Bruce hafði lagt bifreið sinni skammt frá heimili bróður síns. Í bílnum var jólasveinsbúningurinn sem hann hafði notað. Bruce hafði búið þannig um hnútana að ef búningurinn yrðir tekinn yrði bílinn alelda. Sprengjudeild lögreglunnar tók enga áhættu hvað bílinn áhrærði og sprengdi hann í loft upp. 

Við líkið af Bruce voru fjórar hálfsjálfvirkar skammbyssur og að minnsta kosti 200 skot. Heima hjá Bruce, í Montrose, fann lögreglan fimm tómar öskjur utan af skammbyssum, tvær haglabyssur og bensíndunk. 

Bruce ætlaði einnig bana sinni eigin móður því hún hafði hallast um of á sveif með Sylviu.

Skilnaður og framfærsla

Hvað ástæður ódæðisins varðaði taldi lögreglan að þær mætti rekja til hjúskaparvandamála. Fyrrverandi eiginkona Bruce hafði sótt um skilnað eftir eins árs hjónaband og töldu sumir að orsökin hefði verið barn Bruce frá fyrra sambandi, sem hann hafði þó ekki séð ástæðu til að upplýsa eiginkonu sína um.

Bruce hafði einnig krafist þess að hann og Sylvia hefðu aðskilinn fjárhag og til að kóróna allt fór hann fram á að hún notaði eigin fé til að sjá þremur börnum hennar farborða.

Við skilnaðinn var úrskurðað að Bruce skyldi greiða 1.784 dali mánaðarlega í framfærslu auk þess sem Sylvia fékk 10.000 í sinn hlut. Hafði Bruce á orði, við vin sinn, að Sylvia væri að blóðmjólka hann. 

Með einhverjum hætti varð ljóst að Bruce ætlaði einnig að bana sinni eigin móður því hún hafði hallast um of á sveif með Sylviu þegar skilnaðurinn var að ganga í gegn. En það gekk ekki eftir.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.