– Ný bók veitir innsýn í heim þeirra sem safna ógnvekjandi og öðruvísi munum
Bandaríski rithöfundurinn Paul Gambino á heiðurinn af nýrri bók um safnara sem sækjast eftir ógnvekjandi og óhefðbundnum gripum eins og fóstrum lífvera, uppstoppuðum stökkbreyttum dýrum og persónulegum munum sem áður voru í eigu margra af þekktustu fjöldamorðingjum heims. Bókin, Morbid Curiosities: Collections of the Uncommon and the Bizarre, er innsýn í heim þeirra sem eru drifnir áfram í leit sinni að hinu undarlega og hefur vakið talsverða athygli.
Gambino hitti fimmtán safnara sem allir státa af stórum einkasöfnum sem öll eiga það sameiginlegt að innihalda óhefðbundna og í flestum tilvikum ógnvekjandi muni. Höfundurinn fellur sjálfur í þann hóp og hefur tilheyrt honum síðastliðin 20 ár. Þekking hans á málaflokknum útskýrir á vissan hátt tilgang bókarinnar en henni er ætlað að draga fram í ljósið persónuleika safnaranna. Þeir séu ekki ögrandi sérvitringar sem glími við erfið andleg veikindi.
Húðflúrarinn bandaríski Paul Booth er einn viðmælenda Gambino en hann hefur komið sér upp myndarlegu safni. Booth er þekktastur fyrir að vera einn fremsti listamaður heims þegar kemur að ógnvekjandi húðflúri og er flestum öðrum fremri í að teikna djöfla og skrímsli. Á heimili hans má finna beinagrindur, uppstoppuð dýr og gamlar grímur og aðra sögulega muni sem tengjast trúarathöfnum þekktra djöfladýrkenda. Að sögn Booth helltist söfnunaráráttan yfir hann á ferðalögum til gamalla evrópskra borga.
Einn þekktasti safnarinn í hópnum er án efa hin 35 ára gamla Nicole Angemi sem starfar sem aðstoðarkona meinafræðings í New Jersey í Bandaríkjunum. Angemi er með um eina milljón fylgjenda á samfélagsmiðlinum Instagram en hún fann sína fyrstu safnmuni í ruslagámi fyrir utan líkhús í New Jersey. Heimili hennar er oft líkt við ógnvekjandi og drungaleg heimkynni Addams-fjölskyldunnar frægu. Þar má finna uppstoppuð hitabeltisdýr og krukkur sem innihalda rotnaðar tennur látinna eiturlyfjafíkla, gallsteina og fylgjur tveggja dætra Angemi í formalín.
Bók Gambino kom út í lok september og hefur síðan þá vakið athygli. Í umfjöllun CNN um hana er vitnað í orð höfundarins um að viðmælendur hans eigi það allir sameiginlegt að hafa mikinn áhuga á sögunni.
„Þeir eru fornleifafræðingar þéttbýlisins, sagnfræðingar og fyrst og frems öllu fræðilegir sýningarstjórar sinna sístækkandi persónulegu einkasafna,“ segir Gambino.