Allt er gott sem endar vel
Flest bendir til þess að búið sé að bera kennsl á heimilislausu stúlkuna í Róm á Ítalíu sem fjallað var um í heimspressunni í gær. DV fjallaði meðal annars um málið.
Sjá einnig: Stúlkan sem enginn veit hver er
Netverjar tóku höndum saman og reyndu að bera kennsl á stúlkuna sem talaði enga ítölsku, svaraði öllum spurningum á ensku og vildi ekki taka við neinum peningum. Voru það samtök sem sérhæfa sig í að hafa upp á týndum einstaklingum sem vöktu athygli á máli stúlkunnar og fjallaði vefútgáfa breska blaðsins Daily Mail, Mail Online, meðal annars um málið. Ítalska lögreglan hafði reynt að bera kennsl á stúlkuna en án árangurs. Stúlkan bjó á götum Rómar og var heimilislaus og auk þess ekki með vegabréf eða persónuskilríki á sér.
En svo virðist vera sem umfjöllun gærdagsins hafi skilað tilætluðum árangri því faðir hennar setti sig í samband við Daily Mail í gær og sagði að þarna væri komin fram dóttir hans, 21 árs sænsk stúlka að nafni Embla Jauhojärvi. Faðir hennar, Tahvo, segir við Mail Online að dóttir hans hafi farið til Ítalíu í maí síðastliðnum til að leggja stund á ítölskunám í höfuðborginni Róm.
Tahvo segir að Embla sé með Asperger-heilkennið og hann hafi ekkert heyrt í dóttur sinni síðan í maí síðastliðnum, að hún hélt til Ítalíu. Tahvo segist hafa reynt ítrekað að fá sænsku lögregluna til að skoða mál dóttur sinnar en það hafi ekki borið árangur, meðal annars í ljósi þess að hún var orðin lögráða. Hefur Tahvo haft samband við ítölsku lögregluna og beðið hana að hafa auga með Emblu þar til hann kemur til Ítalíu.
Tahvo skildi við eiginkonu sína og móður Emblu fyrir þrettán árum og segir hann að Embla hafi búið hjá honum síðastliðin átta ár. „Við vonumst til að ítalska lögreglan finni hana og vonandi getum við sannfært hana í kjölfarið um að koma aftur til Svíþjóðar,“ segir stjúpfaðir Emblu, Bror Thorén, í samtali við Mail Online.