Heimilislaus unglingsstúlka sem hefur hafst við á götum Rómar á Ítalíu hefur fengið marga til að klóra sér í kollinum. Stúlkan talar enga ítölsku, svarar öllum spurningum á ensku og vill ekki taka við neinum peningum.

Í frétt Mail Online, sem fjallar um þetta einkennilega mál, kemur fram að ítalska lögreglan hafi reynt að bera kennsl á stúlkuna en það hafi engan árangur borið. Stúlkan, sem er sögð svara nafninu Maria, á ekki vegabréf eða önnur persónuskilríki. Hefur því verið fleygt fram að þarna gæti verið komin fram ein af þeim fjölmörgu stúlkum sem horfið hafa nær sporlaust á undanförnum árum.

Netverjar hafa tekið höndum saman og reynt að aðstoða við að bera kennsl á stúlkuna svo hún geti komist í hendur ástvina sinna fyrir jól. Missing Persons of America, bandarísk samtök sem halda utan um upplýsingar um fólk sem hefur horfið, sögðu frá því á vefsíðu sinni að einhverjir hefðu haldið því fram að hér væri komin fram Madeleine McCann sem hvarf árið 2007.

Madeleine er þréttan ára í dag, að því gefnu að hún sé á lífi, en að mati samtakanna er umrædd stúlka ekki Madeleine. Það sjáist meðal annars á hægra auga Madeleine.

Aðrir hafa haldið því fram að þarna gæti verið komin fram Amanda Adlai, sem var numin á brott í Michigan í Bandaríkjunum árið 2008, eða Maria-Brigitte Henselmann, sem hvarf í Þýskalandi sama ár. Engin staðfesting á því hefur fengist og þykir það ólíklegt.

Stúlkan er sögð kurteis í viðmóti en sem fyrr segir talar hún ekki ítölsku. Fjallað hefur verið um mál hennar í ítalska sjónvarpsþættinum Chi l‘ha Visto í von um að borin verði kennsl á stúlkuna, en enn sem komið er hefur það engan árangur borið.