Samtal á Skype var örlagaríkt – Myrti fyrrverandi kærustu sína
Michell nokkur Fuller hafði flutt frá Belís til Bandaríkjanna þegar hún var níu ára. Hún fékk síðar ríkisborgararétt og eignaðist dóttur, Desaree Hoskins, með ónafngreindum mann.
Þegar þessi saga hefst bjuggu þær mæðgur í borginni Irving í Dallas-sýslu í Texas, Bandaríkjunum. Michell var 37 ára og starfaði á endurhæfingarstöð og Desaree var 18 ára og gat vart beðið eftir að útskrifast úr miðskóla og útskriftardansleiknum í kjölfarið. Annars stefndi Desaree á frama í sjóher Bandaríkjanna.
Nú er nefndur til sögunnar Tyrone Cade. Tyrone þessi virðist ekki hafa verið vandaður pappír. Árið 1999 hafði hann nauðgað konu í Collin-sýslu og fékk dóm vegna þess árið 2002.
Konan sú og Tyrone höfðu þá verið vinir en ekkert umfram það. Hún hafði boðið Tyrone að koma með henni og vinnufélögum hennar á krá kvöld eitt. Í kjölfarið hafði hún sýnt Tyrone híbýli sín og hann ekki beðið boðanna, hent henni í gólfið og misþyrmt henni kynferðislega.
Önnur ónafngreind kona hafði um eitthvert skeið verið í sambandi með Tyrone á síðasta áratug 20. aldar. Hún hafði séð sitt óvænna og sparkað honum, eins og sagt er. Eftir sambandsslitin hafði hann setið um hana í dágóðan tíma og meðal annars hringt í hana oft og tíðum úr símaklefa skammt frá heimili hennar.
Misskipt er manna láni og ljóst að það lék ekki við Michell því hún kynntist Tyrone og rugluðu þau reytum um skeið, það er að segja Tyrone flutti inn á heimili hennar í Irving.
Árið 2011 var greinilega kominn brestur í sambandið og Michell hafði reynt allt hvað hún gat til að koma Tyrone út af heimilinu og naut við það fulls stuðnings dóttur sinnar, Desaree, og sonar. Vildu börn Michell ekkert af Tyrone vita, voru enda mótfallin sambandinu.
Michell sýndist þegar þarna var komið sögu vænstur kostur að byggja upp samband við sinn fyrrverandi á ný. En það varð aldrei; Tyrone sá til þess.
Þann 27. mars, 2011, stakk Tyrone Michell og Desaree til bana. Að því loknu hafði hann samband við barnsmóður sína, Brandy Besio, og sagði henni hvað hann hafði gert. Brandy fór með Tyrone á lögreglustöð og upplýsti hann lögregluna um morðin.
Sagðist Tyrone hafa stungið Michell ítrekað með hnífi eftir að hann stóð hana að því að hafa átt eggjandi samtal við sinn fyrrverandi á Skype. Desaree heyrði skelfingar- og sársaukavein móður sinnar og reyndi að koma henni til hjálpar. Hún hlaut fyrir vikið sömu örlög.
Við réttarhöldin, í ágúst 2012, þurfti kviðdómur að taka til athugunar þann möguleika að Tyrone kynni að fremja glæp til framtíðar litið. Einnig þurfti að kanna hvort eitthvað við lífshlaup Tyrones réttlætti að hann fengi lífstíðardóm í stað dauðadóms.
Verjandinn taldi að brotið heimili, ástleysi í bernsku, meint kynferðisofbeldi af hálfu móður Tyrones, lág greindarvísitala, þunglyndi og stöðugir verkir vegna íþróttameiðsla ættu að nægja kviðdómi til að mæla með vægari refsingu en dauðadómi.
Þessi rök mæltust ekki vel fyrir hjá frænku Desaree, Andreu Hoskins Coats, sem sagði: „Þú átt enga miskunn skilda. Þú ert skrímsli.“
Kviðdómurinn var henni greinilega sammála því eftir þriggja tíma bollaleggingar varð niðurstaðan dauðadómur og 6. september, 2012, dæmdi dómari Tyrone Cade til dauða.