Edlira var örvingluð – Dæturnar guldu það dýru verði
Að morgni sunnudagsins 9. mars, 2014, hafði fólk í Lecce í Langbarðalandi á Ítalíu samband við lögregluna vegna hávaða sem barst frá íbúð nágranna þess. Þegar lögreglan kom á staðinn mætti henni óhugnanleg sjón; Edlira Dobrusci, 37 ára þriggja barna móðir, var þar þakin blóði frá hvirfli til ilja og, eins og einn lögreglumannanna komst að orði, „blóð rann í stríðum straumi“ um íbúðina.
Edlira hafði stungið dætur sínar þrjár til bana þar sem þær lágu í rúmum sínum og að auki veitt sjálfri sér áverka á úlnliðum og hálsi.
Dæturnar, Simona, 13 ára, Casey, 10 ára, og Lindsey, fjögurra ára, voru úrskurðaðar látnar enda engin áhöld um að Edlira hafði beitt eldhúshnífnum óspart.
Edlira var, kannski eðlilega, ekki í nokkru jafnvægi og öskraði: „Ég hef drepið þær allar.“ Hún var handtekin á staðnum en fljótlega flutt á nærliggjandi sjúkrahús og gefið róandi og gert að sárum hennar.
Ástæða voðaverksins var sú að eiginmaður Edliru, og faðir stúlknanna, hafði tveimur dögum fyrr yfirgefið hana. Hann hafði farið til Albaníu, heimalands þeirra beggja, þar sem hann hugðist upplýsa foreldra sína um hjúskaparslitin.
Að sögn Roccos Italiano, undirofursta í ítölsku lögreglunni, var öll íbúðin blóði böðuð. Dæturnar höfðu allar verið stungnar ítrekað, hver í sínu herbergi en síðan hafði Edlira fært lík þeirra allra í hjónarúmið.
Lögreglan hafði upp á föður stúlknanna í Albaníu og færði honum tíðindin og brotnaði hann gersamlega niður. Í ljós kom að hjónin höfðu glímt við fjárhagserfiðleika, en eins og Italiano hafði á orði, þeir réttlættu engan veginn það ofbeldi sem hafði bitnað á stúlkunum þremur.
Edlira Dobrusci er á bak við lás og slá og bíður réttarhalda vegna morðanna. Hún á ekki von á góðu ef eitthvað er að marka orð Angelino Alfano, innanríkisráðherra Ítalíu: „Við munum ekki láta þann sem framdi þennan hryllilega glæp komast upp með það.“