Ólafur hefur fengið ýmislegt í netið hjá sér en þetta hefur hann ekki séð fyrr
Ólafur Sigurðsson skipstjóri á Sólrúnu EA frá Árskógssandi fékk hauskúpu af furðulegu í dýri í netið hjá sér á dögunum. Dýrið reyndist vera sauðnaut, að öllum líkindum frá Grænlandi. Hausinn veiddist í Eyjafirði við Hrólfssker á Þverhausamiðum.
Þetta þótti Ólafi nokkuð sérstök veiði þar sem sauðnaut finnast ekki á Íslandi. „Mér finnst líklegt að veiðimaður hafi komið heim með dýrið og sett í sjóinn til að ná húðinni af og glatað þessu,“ segir Ólafur. Hann segist ekki vera vanur að fá önnur dýr en sjávardýr í netið hjá sér en þó hafi stundum veiðst ótrúlegir hlutir í netin fyrir norðan.
„Það hefur veiðst hérna baðkar og alls kyns dót einn sjómaður hérna veiddi einu sinni bónvél,“ segir Ólafur, en þetta er í fysta sinn sem sem sauðnaut veiðist í Eyjafirði eftir því sem hann best veit.