Óvenjulegt skilnaðarmál fyrir rússneskum dómstólum
Skilnaðarréttur í Rússlandi hefur komist að þeirri niðurstöðu að glæsivillu hjóna sem nú eru skilin verði skipt í tvennt. Málið þykir allt hið undarlegasta enda verður múrveggur reistur í gegnum mitt húsið.
Margarita Tsvitnenko, 45 ára, segir að skilnaðarétturinn hafi komist að þessari niðurstöðu í ljósi óyfirstíganlegs ágreinings milli hennar og fyrrverandi eiginmanns hennar. Hún birti myndir á samfélagsmiðlum af framkvæmdum sem nú standa yfir í húsinu.
Húsið sem um ræðir er í Rublyovka-hverfinu í Mosvku, að því er breska blaðið Mirror greinir frá. Að sögn Margaritu hefur þetta skapað nokkur vandamál. Þannig er stigi í húsinu í þeim helmingi þess sem tilheyrir fyrrverandi eiginmanni hennar. Þetta gerir það að verkum að Margarita kemst ekki upp á aðra hæð þar sem svefnherbergi og baðherbergi er meðal annars að finna.
„Rétturinn sagði að ég þyrfti að útbúa minn eigin stiga,“ segir hún og bætir við að hún hafi ekki efni á því að ráðast í slíkar framkvæmdir. Hún bað um frest til að ráðast í framkvæmdirnar og fór þess á leit að á meðan fengi hún að nota stigann í hinum helmingi hússins. Þær umleitanir hafa engan árangur borið.