74 ára gamall karlmaður frá Nýju-Taipei í Taívan lést eftir að hann gleypti óvart fölsku tennurnar sínar í hita leiksins eftir hálftíma með 62 ára gamalli vændiskonu.

Vændiskonan hringdi umsvifalaust á sjúkrabíl en maðurinn var úrskurðaður látinn á vettvangi.

Í frétt Telegraph um málið er haft eftir vændiskonunni að maðurinn hafi skyndilega fallið aftur fyrir sig í rúminu. „Augu hans voru opin en hann lá bara hreyfingarlaus. Ég reyndi að hrista hann og vekja hann.“

Ólöglegt er að selja vændi í Taívan en ekki að kaupa það. Undanfarin ár hafa verið uppi áform um að lögleiða vændi að einhverju leyti.
Ekki fylgir fréttinni hvort vændiskonunni verði refsað en fari svo á hún yfir höfði sér sekt sem nemur allt að 100 þúsund íslenskum krónum.