Tvær rússneskar konur hafa höfðað mál á hendur sjúkrahúsinu í Belyaevsk í Rússlandi. Önnur kvennanna, Olga Buyanova, ákvað að láta framkvæma DNA-próf þar sem hana grunaði að hún væri ekki líffræðileg dóttir foreldra sinna. Niðurstöður DNA-rannsóknarinnar voru skýrar og reyndist grunur hennar á rökum reistur.

Konan hafði samband við forsvarsmenn sjúkrahússins sem fóru að gramsa í gögnum og kanna hvaða konur hefðu verið á fæðingardeildinni sama dag og móðir hennar. Leitin skilaði árangri og kom í ljós að Olgu og annarri stúlku, Nataliu Arhipova, hefði verið víxlað á fæðingardeildinni. Höfðu foreldrar Olgu fengið Nataliu í hendurnar og öfugt. Konurnar hafa nú höfðað mál þar sem þær krefjast þess að fá 48,6 milljónir króna samanlagt í bætur.