Nýjasta stórstjarna veraldarvefsins er hundurinn Ozzy en hann hefur magnað jafnvægisskyn. Á meðan flestir hundar elta ketti eða naga gömul bein hefur þessi hundur mikla hæfileika í fimleikum.

Ozzy varð frægur eftir að steinhissa vegfarandi tók upp myndband af hundinum haldandi jafnvæginu á bakfótunum á mjórri keðju. Hann setti myndbandið inn á Youtube og á einum degi fékk það meira en 80.000 áhorf.

Eigandi Ozzy er hinn 50 ára trésmiður Nick Johnson frá Norwich í Bretlandi. Nick eyðir allt að fimm tímum á dag í að æfa hundinn. Meðal annars getur Ozzy sótt farsíma eigandans og haldið jafnvægi á götuskiltum.

„Ég var örlítið hræddur fyrst af því að ég hafði aldrei átt hund áður og margir sögðu að hundaþjálfun væri mjög erfið. En Ozzy var dásamlegur og það var mjög létt að þjálfa hann.“ segir Nick.