Plankaæðið virðist komið til að vera á Íslandi þar sem konur og karlar keppast nú við að láta mynda sig á sem frumlegastan máta í láréttri stöðu.

Íslenska plankasamfélaginu barst frægur liðsstyrkur í gærkvöldi þegar sjónvarpsstjarnan Sigmar Guðmundsson smellti sér upp á Kastljósborðið og lá þar stífur eins og fjöl á meðan hann lokaði umfjöllun þáttarins um plankaæðið og fór í auglýsingar.

Uppátækið hefur vakið mikla athygli. Íslenska plankasamfélagið birti skjáskot af uppstillingu Sigmars á Facebook-síðu sinni og virðist sjónvarpsmaðurinn fá fullt hús í einkunn fyrir tilburðina hjá fylgismönnum.