Í dag var fyrsti dagurinn um nokkurt skeið þar sem vindur var sæmilega hægur með suðurströndinni. Það þýðir að nú ætti að vera hægt að hefjast handa við dýpkun Landeyjahafnar. Áfram verður milt í veðri en smám saman fer hitinn í eðlilegra horf miðað við það sem verið hefur. Þó er ekkert kuldakast í kortunum.

En veðurspár dagsins og næstu daga líta svona út:

Í kvöld fimmtudag

Austan og norðaustan 5-10 m/s. Skúraveður víða um land. Hiti 10-15 stig í kvöld.

Á morgun föstudag

Hæg austlæg átt víðast hvar en þó 5-10 m/s við suðurströndina. Skúrir en þurrt og bjart með köflum norðanlands. Hiti 10-16 stig svalast við suðaustur- og austurströndina.

Á laugardag

Hæg breytileg átt í fyrstu en suðvestan 5-10 m/s sunnan og vestan til undir kvöld. Rigning eða skúrir en úrkomulítið og skýjað með köflum suðaustan til á landinu. Hiti 11-16 stig, hlýjast á suðausturlandi.

Á sunnudag

Suðaustan 5-13 m/s, stífastur sunnan- og vestanlands. Talsverð rigning á Suður- og Vesturlandi en skýjað og úrkomulítið Norðaustan- og Austanlands. Hiti 10-15 stig að deginum.

Veðurspá gerð kl. 19:45, 9. september. SÞR.