Victoria Beckham hefur gert allt frá því að syngja til þess að skrifa bók. En nú vill kryddpían verða alvörugefin leikkona. Hún hefur upp á síðkastið splæst í einkaleiklistartíma í Los Angeles og gæti nú þegar verið komin með hlutverk.

Victoria hefur nú þegar fengið afar lítið hlutverk í framhaldinu af Sex and the City myndinni en nú reynir umboðsmaður hennar að fá mun stærra hlutverk fyrir hana.

Heimildarmaður í innsta hring kryddpíunnar segir við The Sun að Victoria hafi smitast af leiklistarbakteríunni. Nú ætlar hún að gera hvað sem er til að ná frama í kvikmyndabransanum.

Victoria er með smá reynslu úr bransanum. Hún lék í Spice World, kvikmynd sem Spice Girls gerðu, og lék lítið hlutverk í sjónvarpsþáttunum Ugly Betty.

Victoria ku ganga mjög vel í leiklistartímunum og ætlar að fara í leiklistarprufur von bráðar.