Hjónakornin David Arquette og Courteney Cox-Arquette eru í viðræðum um að leika í nýjum Scream-þríleik en framleiðsla nýju seríunnar á að hefjast næsta haust. Courteney er auðvitað langfrægust fyrir hlutverk sitt sem Monica í Friends-þáttunum.

Scream-myndirnar sem fjölluðu um grímuklædda morðingja nutu gífurlegra vinsælda á tíunda áratugnum og komu tvær myndir út með árs millibili, árin 1996 og 1997 en sú þriðja og síðasta kom út árið 2000. Upp úr Scream-myndunum urðu líka til myndir eins og I Know What You Did Last Summer og grínmyndin Scary Movie.

Kevin Williamsson mun skrifa nýju myndirnar en hann skrifaði einnig hinar þrjár. Hann ætlar sér að hafa marga af sömu karakterunum í nýju myndunum og voru í þeim gömlu. Mun David því leika seinþroska lögreglumanninn Dewey og Courteney harðsvíruðu fréttakonuna Gale Weathers eins og þau gerðu af svo mikilli snilld í hinum myndunum þremur. Ekki er vitað hvort Neve Campbell, sem lék eitt aðalhlutverkanna í fyrstu myndunum, ætli að vera með í þeim nýju eða aðrar stjörnur eins og spéfuglinn Jamie Kennedy.