Söngkonan Rihanna var heiðruð í New York á miðvikudag þegar henni var veitt viðurkenning fyrir að hafa selt 12 milljónir platna síðan hún gaf út sína fyrstu. Söngkonan unga hefur heldur betur slegið í gegn á undanförnum árum en það var L.A. Reid, stjórnarformaður The Island Def Jam Music Group, sem afhenti söngkonunni verðlaunin.

Rihanna hefur ekki átt sjö dagana sæla undanfarna mánuði. Hún var fórnarlamb alvarlegrar líkamsárásar þegar Chris Brown, þáverandi kærasti hennar, gekk harkalega í skrokk á henni. Fyrir skömmu birtust svo nektarmyndir af söngkonunni á netinu en kenningar hafa verið uppi um að Brown hafi komið þeim þangað til að ná sér niðri á Riri.