„Þetta kom niður á þvílíkum hraða. Það var eins og það væri verið að grýta steinum,“ segir Björgvin Páll Gústavsson, atvinnu- og landsliðsmarkvörður í handbolta, um haglél sem hann og félagar hans lentu í á sólríkum sumardegi í Þýskalandi.

„Þetta var síðasta æfing ársins hjá liðinu þannig að það var ákveðið að fara með allar fjölskyldurnar í tennis í næsta bæ. Þar vorum við að spila í sumar og sól þegar það fór að skyggja aðeins. Síðan fór að demba niður þessum risa hnullungum sem voru nú sumir á stærð við tennisboltana sem við vorum að spila með,“ segir Björgvin og hlær við.

„Það voru margir sem fóru á taugum enda hefði hvort sem það væri barn eða fullorðinn fengið gat á höfuðið hefði einn svona hnullungur lent á hausnum á einhverjum. Okkur tókst þó að flýja inn í skála áður en aðaldemban kom þannig að enginn slasaðist sem betur fer. Það voru þó dældir á öllum bílunum okkar og auðvitað alls staðar í kring þar sem þetta haglél var. Það verður nóg að gera hjá tryggingafélögunum núna,“ segir Björgvin Páll Gústavsson.