Idol-dómarinn Kara DioGuardi stal senunni í gærnótt þegar úrslit bandaríska Idolsins fóru fram. Hún flassaði fallegum likama sínum til að stríða þátttakandanum Katrinu Darrell sem er betur þekkt sem bikiní-stúlkan. ATHUGIÐ! Ekki lesa lengra ef þú vilt ekki vita hver vann Idolið.

Hinn sykursæti Kris Allen kom sá og sigraði í Idolinu í gær. Úrslitin komu mörgum á óvart þar sem flestir hefðu veðjað á að keppinautur hans, Adam Lambert, myndi fara með sigur af hólmi.

„Þetta er svakalegt. Ég veit ekki hvað ég á að segja. Adam átti þetta skilið,“ segir sigurvegarinn við fréttastofu AP.

Allen er 23 ára strákur frá bænum Conway í Arkansas fylki. Það fór lítið fyrir honum í byrjun keppninnar en síðustu vikur hefur hann bætt sig gríðarlega og heillað bandarísku þjóðina upp úr skónum með hjartnæmum söng og gítarspili.

Bæði Allen og Lambert sungu þrjú lög hvor í gær. Lambert byrjaði keppnina með útgáfu sinni af Tears for Fears laginu Mad World. Þá steig Allen á stokk með gamla Bill Withers laginu Ain't No Sunshine. Því næst söng Lambert Sam Cooke lagið A Change is Gonna Come og Allen svaraði með What's Going On. Að lokum sungu báðir keppendurnir No Boundaries sem var sérstaklega samið fyrir sigurvegarann.

Úrslitaþátturinn var sýndur í beinni útsendingu á Stöð 2 í gær og voru fjölmargir heimsfrægir listamenn sem prýddu sviðið og sungu með hinum ýmsu Idol keppendum. Má þar nefna gamla refinn Rod Stewart, Cindy Lauper, Kiss og Black Eyed Peas.