Það er farið að hitna í kolunum í Hollywood þar sem bitastæðasta hlutverk seinni tíma stendur nú til boða. Hver mun leika Frank Sinatra í nýjustu mynd Martin Scorsese? Leonardo DiCaprio er víst kominn í söngskóla og hefur ráðið besta raddþjálfara í heimi til að hljóma eins og Sinatra. En einhverra hluta vegna er Jamie Foxx sagður líklegastur.

Foxx, sem lék Ray Charles snilldarlega í mynd um ævi snillingsins, er víst ofarlega á listanum hjá framleiðendum myndarinnar þrátt fyrir að vera, eins og flestir vita dökkur á hörund, nokkuð sem Sinatra var ekki.

Menn eins og George Clooney, Justin Timerlake, Harry Connick Jr og DiCaprio eru allir sagðir slefa á eftir hlutverkinu, en Foxx hefur nokkuð sem flestir þeirra hafa ekki. Frábæra söngrödd.

Hvort slúðurpressan ytra sé komin með flensu á eftir að koma í ljós, en spennandi verður að sjá hver hreppir hnossið að leika Bláskjá.