Dita von Teese mætti til æfinga með Evróvisjón-förum Þýskalands í dag og vakti verðskuldaða athygli. Dita, sem er bandarísk og frægust fyrir eggjandi burlesque-danssýningar sínar og fyrir að hafa verið gift Marilyn Manson um tíma, náði að hrista laglega upp í siðapostulum Evróvisjón. Hún flassaði nefnilega mannskapinn á æfingu.

Dita, sem hefur viðurkennt að hafa aldrei heyrt af Evróvisjón keppninni fyrr en þýsku flytjendurnir í Alex Swings Oscar Sings höfðu samband við hana, tók þátt í sinni fyrstu æfingu með þeim félögum í dag. Mikil eftirvænting ríkti fyrir sýningunni. Og Dita olli engum vonbrigðum.

Hún flassaði brjóstunum eins og margir höfðu svosem búist við en hvort hún fái að gera það í sjónvarpinu á laugardagskvöldið er hæpið. Hún bar reyndar litrandi stjörnur yfir geirvörtunum en afar strangar reglur gilda um hverskonar nekt á sviði í Evróvisjón.

Þýska lagið, Miss Kiss Bang Bang, er 17. í röðinni á laugardaginn og mun karlpeningurinn eflaust bíða stjarfur við skjáinn í von um að Dita verði svolítið óþekk í Evróvisjón.